“Daryo” nashri 2-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Pekin Rossiyaga harbiy yordam bersa AQSH Xitoyga sanksiyalar kiritadi
Pekin Moskvaga harbiy yordam bersa, AQSH hukumati o‘z ittifoqchilari bilan Xitoyga qarshi sanksiyalar qo‘llashga tayyor. Bu haqda Reuters xabar beradi.
Manbalarga ko‘ra, Qo‘shma Shtatlar Xitoyga nisbatan ehtimoliy cheklovlarni muvofiqlashtirish uchun G7 a’zolaridan yordam so‘ramoqchi.
Hozirda Ittifoqchilar o‘rtasidagi muzokaralar dastlabki bosqichda ekanligi sabab aynan qanday cheklovlar ko‘rib chiqilayotgani hali noma’lum.
Ushbu vaziyatni aniqroq tushunish va atroflicha tahlil qilish uchun, AQSHning Xitoyga sanksiyalar kiritishiga olib kelayotgan, sabablarni ko‘rib chiqsak bo‘ladi.
Bundan avval AQSH sanksiyalariga tushgan Xitoyning Spacety Co kompaniyasi Ukrainadagi “Vagner” guruhiga sun’iy yo‘ldoshdan olingan suratlarni uzatganlikda ayblandi.
Fevral oyida AQSH davlat kotibi Entoni Blinken Xitoy Rossiyaga noharbiy yordam ko‘rsatayotganini va qurol yetkazib berish masalasini ham ko‘rib chiqayotganini aytdi.
O‘sha paytda, Xitoy Ukrainadagi urushga aynan Amerika qurol-yarog‘lari sabab bo‘layotganini aytib, AQSHni aybladi.
The Guardian nashri esa Xitoy rossiyaparast dezinformatsiyalar va Ukrainadagi urush haqidagi xabarlar uchun global miqyosda ishlab, hatto Moskvadan ko‘ra ko‘proq pul sarflashini yozdi.
Uning “urushni NATO boshlagani haqidagi" takror tezislari sabab ayrim davlatlar ma’lum pozitsiyani egallash chetda tursin, Ukrainaga hujum bosqinchilik ekanini tan olmaydi.
Ukrainadan keyingi mo‘ljal...
Moldova bosh vaziri Dorin Rechan Rossiyaning Moldovaga bostirib kirishi ehtimoldan yiroq ekani, chunki u ikki frontda kurasha olmasligi va buning uchun resurslari yetmasligini ta’kidladi.
Rechanning aytishicha, Rossiya Moldovaga hujum qila olmaydi, chunki ularning orasi juda uzoq, mamlakatlarni Ukraina ajratib turadi.
“Rossiya eskalatsiya uchun yetarli resurslarga ega emas. Bundan tashqari, Rossiya Federatsiyasi Moldovaga harbiy yo‘l bilan bora olmasligi ham aniq. Dnestrbo‘yi mintaqasi esa biz kabi tinchlik va barqarorlikka intiladi”, — dedi Moldova bosh vaziri.
Moldova hozirda asosan Ukrainaning havo hujumidan mudofaa tizimlari bilan himoyalangan.
Bungacha Moldova razvedkasi Rossiya 2023-yil boshida mamlakatga qarshi urush boshlashni rejalagani, ammo ssenariyni amalga oshirish Ukrainadagi vaziyatiga bog‘liqligini ma’lum qilgan.
Rossiya tashqi ishlar vaziri Sergey Lavrov esa bunga javoban G‘arb davlatlari Moldovani “navbatdagi Ukraina” sifatida ko‘rayotganini da‘vo qildi.
Rossiya gazi va elektr energiyasiga qaramlikdan qutulishga harakat qilayotgan davlat
Ayni paytda Moldova davlati Rossiya gazi va elektr energiyasi qaramligidan chiqish uchun harakatlarni boshlagan.
2023-yil fevral oyi oxirida Infratuzilma va mintaqaviy rivojlanish vaziri Andrey Spinu Moldova Rossiyadan gazga qaramlikni to‘xtatganini e’lon qildi. “Tarixda birinchi marta mamlakatimiz o‘ng qirg‘og‘i ‘Gazprom’ tomonidan yetkazib beriladigan gazni isteʼmol qilmaydi. O‘tgan yildan beri zaxiralarni yaratamiz va bir manbaga qaramlikni to‘xtatish uchun muqobillarni topamiz, deb va’da berib keldik. Biz bunga erishdik”, — deydi vazir.
Hozirda hukumat “yashil energiyaga o‘tish bo‘yicha o‘zining ambitsiyali reja”sini tayyorlamoqda
O‘qituvchilar va majburiy mehnat. O‘zbekistonda bu masalada yangi qonun kuchga kirmoqda. Tafsilotlar bilan tanishamiz
Endilikda O‘zbekistonda o‘qituvchilarni qayta majburiy mehnatga jalb qilganlar jinoiy javobgarlikka tortiladi.
Senatning navbatdagi majlisida bu borada Jinoyat kodeksiga hamda Ma’muriy javobgarlik to‘g‘risidagi kodeksga qo‘shimcha va o‘zgartishlar kiritish haqida”gi qonun qizg‘in muhokama qilindi.
Hozirgacha pedagoglarni kasbiy faoliyati bilan bog‘liq bo‘lmagan tadbirlarga noqonuniy jalb etish, pedagog xodimlar hududlardagi ijtimoiy-iqtisodiy muammolarni hal etish guruhlariga asossiz kiritilishi, ulardan turli hisobot va ma’lumotlar talab etish holatlari davom etmoqda.
Yangi qonunga ko‘ra, ta’lim tashkilotining pedagog xodimini mehnatga ma’muriy tarzda qayta majburlaganlik uchun bazaviy hisoblash miqdorining 150 baravaridan 200 baravarigacha (60 million so‘m) miqdorda jarima yoki 3 yilgacha muayyan huquqdan mahrum qilish yoxud 3 yilgacha axloq tuzatish ishlari bilan jazolash belgilanadi.
Bundan tashqari, pedagogning ta’lim oluvchilar bilimini to‘g‘ri va xolis baholashiga ta’sir ko‘rsatish yoki qonunga xilof ravishda aralashish, ta’lim tashkiloti pedagog xodimining xizmat vazifalarini bajarishiga to‘sqinlik qilish uchun ham javobgarlik kuchaytirilmoqda.
Bunda kodeksdagi sanksiyalar fuqarolarga bazaviy hisoblash miqdorining 10 baravaridan 15 baravarigacha, mansabdor shaxslarga esa 15 baravaridan 20 baravarigacha (6 million so‘m) miqdorda jarima soladi. Yoki 15 sutkagacha ma’muriy qamoqqa olishga sabab bo‘ladi.
Izoh (0)