Namanganda joriy yil 21-maydan 4-iyungacha anʼanaviy xalqaro gullar festivali bo‘lib o‘tadi. Bu haqda “Daryo” muxbiri Azizbek Abduvaliyev xabar bermoqda.
Oltmish ikkinchi bor o‘tkaziladigan festival Namangan viloyat hokimligi hamda Madaniyat va turizm vazirligi hamkorligida tashkil etilmoqda.
Festival bo‘lib o‘tadigan Namangan shahridagi Bobur nomli istirohat bog‘ida 15 million, shahar ko‘chalarida 10 million, jami 25 million gul va ko‘chatlar ekish rejalashtirilgan. Shuningdek, viloyat markazi ko‘chalari ham bayramona bezatiladi.
Tadbirda bu yil mahalliy gulchilardan tashqari Germaniya, Hindiston, Polsha, Janubiy Koreya va Italiyadan gulchilar qatnashish istagini bildirgan.
Mehmonlar geografiyasi ham kengaygan: 2022-yilda festivalga 30 dan ortiq xorijiy davlatdan mehmonlar kelgan bo‘lsa, bu yil 40 dan ortiq mamlakatdan mehmonlar kutilmoqda. Ular orasida diplomatik korpus vakillari, Namangan bilan birodarlashgan viloyat va shaharlar mutasaddilari, qo‘shma korxonalarning chet ellik rahbarlari bor.
Viloyat hokimining o‘rinbosari Botir Nuridinovning bildirishicha, festivalga o‘tgan yili 2,3 million sayyoh kelgan. Bu yil esa ularning soni 3 millionga yaqin bo‘lishi kutilmoqda.
Festival yakunida tadbirda munosib ishtirok etgan gulchilar va korxona-tashkilotlar bir necha nominatsiyalar bo‘yicha taqdirlanadi. Odatda ular avtomobil va pul mukofotlaridan iborat bo‘ladi.
Izoh (0)