Наманганда жорий йил 21 майдан 4 июнгача анъанавий халқаро гуллар фестивали бўлиб ўтади. Бу ҳақда “Дарё” мухбири Азизбек Абдувалиев хабар бермоқда.
Олтмиш иккинчи бор ўтказиладиган фестиваль Наманган вилоят ҳокимлиги ҳамда Маданият ва туризм вазирлиги ҳамкорлигида ташкил этилмоқда.
Фестиваль бўлиб ўтадиган Наманган шаҳридаги Бобур номли истироҳат боғида 15 миллион, шаҳар кўчаларида 10 миллион, жами 25 миллион гул ва кўчатлар экиш режалаштирилган. Шунингдек, вилоят маркази кўчалари ҳам байрамона безатилади.
Тадбирда бу йил маҳаллий гулчилардан ташқари Германия, Ҳиндистон, Польша, Жанубий Корея ва Италиядан гулчилар қатнашиш истагини билдирган.
Меҳмонлар географияси ҳам кенгайган: 2022 йилда фестивалга 30 дан ортиқ хорижий давлатдан меҳмонлар келган бўлса, бу йил 40 дан ортиқ мамлакатдан меҳмонлар кутилмоқда. Улар орасида дипломатик корпус вакиллари, Наманган билан биродарлашган вилоят ва шаҳарлар мутасаддилари, қўшма корхоналарнинг чет эллик раҳбарлари бор.
Вилоят ҳокимининг ўринбосари Ботир Нуридиновнинг билдиришича, фестивалга ўтган йили 2,3 миллион сайёҳ келган. Бу йил эса уларнинг сони 3 миллионга яқин бўлиши кутилмоқда.
Фестиваль якунида тадбирда муносиб иштирок этган гулчилар ва корхона-ташкилотлар бир неча номинациялар бўйича тақдирланади. Одатда улар автомобиль ва пул мукофотларидан иборат бўлади.
Изоҳ (0)