Davlat statistika qo‘mitasi O‘zbekiston viloyatlari markaziy hududlari kesimida 2023-yilning fevralida tayyor palovning o‘rtacha narxlariga oid ma’lumotlarni e’lon qildi.
Ma’lum qilinishicha, eng qimmat palov Toshkent shahrida sotilgan bo‘lib, bir portsiyasi 27 200 so‘m bo‘lgan. Eng arzon osh esa Farg‘ona viloyatida — bir portsiyasi 19 000 so‘mdan sotilgan. Shu kungacha eng arzon palov Namangan viloyatida qayd etib kelinayotgandi.
Qolgan hududlardagi osh markazlarida sotilayotgan bir portsiya palovning o‘rtacha narxlari quyidagicha bo‘lgan:
- Qoraqalpog‘iston Respublikasi — 19 400 so‘m;
- Andijon viloyati — 21 800 so‘m;
- Buxoro viloyati — 22 400 so‘m;
- Jizzax viloyati — 23 000 so‘m;
- Qashqadaryo viloyati — 23 400 so‘m;
- Navoiy viloyati — 20 400 so‘m;
- Namangan viloyati — 19 300 so‘m;
- Samarqand viloyati — 24 000 so‘m;
- Surxondaryo viloyati — 23 000 so‘m;
- Sirdaryo viloyati — 22 600 so‘m;
- Toshkent viloyati — 21 700 so‘m;
- Xorazm viloyati — 22 400 so‘m.
Qo’mita ma’lumotida keltirilishicha, narxlarni ro‘yxatga oluvchi tomonidan kuzatuv o‘tkazilgan kun va vaqtdagi narx-navo qayd etilib, bunda vaqt va joyiga qarab narxlar o‘zgarib turadi. Mazkur ma’lumotlarning shakllanishi jarayonida faqatgina tanlab olingan umumiy ovqatlanish muassasalari (Osh markazlari)dagi palovning o‘rtacha narxlari hisobga olingan bo‘lib, restoran va choyxonalardagi narxlar inobatga olinmagan.
O‘zbekistonda eng ommaviy taom — osh narxlari to‘g‘risidagi ma’lumotlarni shakllantiruvchi “Palov indeksi” 2020-yilning yanvaridan joriy etilgan. Ushbu ma’lumotlarni shakllantirishda respublikaning barcha hududlarida 1 kilogramm palov tayyorlash uchun sarflanadigan masalliqlar miqdori o‘rganib chiqiladi. Shunga ko‘ra, umumiy ovqatlanish muassasalarida bir porsiya palovning o‘rtacha narxi belgilanadi.
Izoh (0)