Gollivudda ko‘p yillardan buyon eski film va multfilmlarning qayta ishlangan talqinlari yaratib kelinmoqda. Ba’zan qiziqarli asarlar yaratilsa, ko‘p hollarda yangi talqinlar tanqidga uchrashmoqda.
“Shrek-5” multfilmidagi Shrek
“Shrek” franshizasi — 2000-yillarning haqiqiy afsonasi. Birinchi multfilm mualliflari yangi turdagi qahramonni - odatda ertaklarda yovuz deb hisoblangan personajni taqdim etishdi. Ammo uni jozibador va nihoyatda hazilkash qilib yaratishdi. Keyingi uch qismda qahramonlarning tashqi ko‘rinishi deyarli o‘zgarmadi, faqat grafika takomillashdi. Mualliflar faqat bir marta “Etik kiygan mushuk” spin-offining ikkinchi qismida tajriba o‘tkazishdi — deyarli anime uslubidagi chizilgan grafikani qo‘shishdi.
Biroq 2025-yilda “Shrek 5”ning treyleri chiqdi. Chamasi bu qismda ijodkorlar multfilm qahramonlarini yanada rеalistik qilishga intilgan, natijada ular vahimali ko‘rinishga ega bo‘lib qolgan. Shrek dastlabki kadrlarda go‘yo skufga aylangandek yoki botoksni haddan tashqari ishlatib yuborgandek ko‘rinadi. Uning g‘ayritabiiy shishgan va silliq yuzini boshqacha tushuntirish qiyin.
“Kosmik jem: Yangi avlod” filmidagi Lola Banni
Multfilm qahramonlarini haqiqiy aktyorlar bilan uyg‘unlashtirgan “Kim Rojer quyonini tuzoqqa tushirdi?” filmi muvaffaqiyatidan so‘ng, boshqa ijodkorlar shunga o‘xshashlarini yaratishga bir necha bor urinib ko‘rdi. Eng mashhur misollardan biri Maykl Jordan ishtirok etgan “Kosmik jem” filmidir. Filmdagi qahramonlar orasida Lola Banni ham bor.
2021-yilda “Kosmik jem: Yangi avlod” hikoyasining davomi ekranlarga chiqdi. Unda Maykl Jordan o‘rniga Lebron Jeyms tanlandi va shu bilan birga ssenariydan tortib qahramonlar tashqi ko‘rinishigacha bo‘lgan deyarli barcha jihatlari buzib ko‘rsatildi. Syujet bema’niroq tus oldi. Bundan tashqari, Lolani yanada faolroq qilishga qaror qilinib, uning tana nisbatlari ham o‘zgartirildi. Uning yangi qiyofasi juda ko‘p bahslarga sabab bo‘ldi.
2019-yilgi “Qirol sher” multfilmidagi barcha personajlar
Disney studiyasi “Qirol sher”ning yangi talqinini film sifatida taqdim etdi, biroq daromadlar oshgach, uni eng ko‘p kassa yig‘gan animatsion asar deb atashdi. 2019-yilgi “Qirol sher” xuddi shu nomdagi klassik multfilmning deyarli so‘zma-so‘z qayta hikoyasi, lekin qahramonlar haqiqiy tasvirga o‘xshamagan.
Multfilmda hayvonlar bejiz odamga o‘xshatilmagan edi: ularning ko‘zlari, tishlarining shakli va yuz ifodalari insonnikiga o‘xshardi. Remeykda barcha qahramonlar haqiqiy hayvonlar va qushlarga o‘xshaydi. Shu sababli ular deyarli jilmayishmaydi, nigohlarida esa hissiyot yo‘q. Bular shunchaki gapirganda jag‘larini qimirlatadigan hayvonlar, xolos.
“Suv parisi” filmidagi Flaunder
“Suv parisi” filmining qayta ishlangan talqini hali ekranlarga chiqmasidan oldin janjallar markaziga tushdi. Avvalo, bosh rolni qora tanli aktrisa Xolli Beyli ijro etgani tufayli. Biroq shu fonda negadir Flaunder bilan yuz bergan fojia e’tibordan chetda qoldi.
Aslida bu baliqcha Ariyelning barcha sarguzashtlarida doimiy hamrohi hisoblanadi. U sodda va quvnoq sho‘x bo‘lib, bu uning qiyofasida ham aks etadi: katta ko‘zlari va doimiy tabassumi qahramonning g‘ayratini ta’kidlaydi. Qayta ishlangan talqinda esa shunchaki ba’zan og‘zini ochadigan oddiy baliq, xolos.
“Prostokvashino” multserialida Fyodor amaki
“Prostokvashino”ning yangi seriyalarini tanqid qilishdan oldin Eduard Uspenskiyning so‘nggi kitoblarini o‘qib chiqqan ma’qul. Ularda pora, soliqlar, internet va arvohlar haqida hikoya qilinadi.
Ammo ssenariylardan ham ko‘ra vizual effektlar ko‘plab e’tirozlar bor. U ancha sodda va qahramonlar oddiy bo‘lib qolgan. Ayniqsa, Fyodor amakiga umuman e’tibor berilmaganga o‘xshaydi. Hatto zamonaviy soch turmagi bilan ham tomoshabinda taassurot uyg‘otmaydi.
“Senimi, shoshmay tur! Ta’tillar” multserialidagi quyon
Aslida “Senimi, shoshmay tur”!” multfilmining davomi bir necha marta suratga olingangan: alohida qismlar 2000-yillarda va hatto 2010-yillarda ham efirga uzatilgan. Biroq 2021-yilda butunlay yangicha talqin paydo bo‘ldi.
Bu versiya to‘liq kompyuter 3D grafikasiga o‘zgartirildi. Ammo u Pixar studiyasi darajasiga yetishiga hali ancha bor: qahramonlar burchakli chiqib qolgan, fon elementlari esa umuman ishlanmagan. Bo‘ri qaysidir jihatdan klassik qahramonga o‘xshaydi. Quyon esa shunchaki sxematik tarzda tasvirlangan — u mutlaqo silliq va hissiz bo‘lib qolgan.
2017-yilgi “O‘rdak hikoyalari” multserialidagi barcha o‘rdaklar
Yangi “O‘rdak hikoyalari” syujet jihatidan avvalgisidan ham qiziqarli — masalan, Villi, Billi va Dilli shaxsiy xususiyatlarga ega bo‘lib, nafaqat kiyimlarining rangi, balki tashqi ko‘rinishlari bilan farqlandi, Skruj amaki esa yanada g‘ayratli qilib tasvirlandi.
Biroq personajlarning yangi dizayni ko‘plab bahs-munozaralarga sabab bo‘ldi. To‘g‘ri, u avvalgisidan yomon emas — shunchaki boshqacha. Mualliflar komiks uslubiga tayanishga qaror qilishdi, shuning uchun qahramonlarni yanada aniq chizishdi. Ammo klassik multfilm muxlislari uchun to‘rtburchak boshlar va burchakli tanalarga ko‘nikish juda qiyin bo‘ldi.
Izoh (0)