O‘zbekistonda yo‘l-transport hodisalarining oldini olish maqsadida yo‘laklarda harakatlanuvchi piyodalar uchun sariq jiletlardan foydalanish tartibi joriy etilishi haqida maʼlum qilingan edi. YHXX mazkur xabarlar yolg‘on ekanini xabar qildi.
Bayonotda Vazirlar Mahkamasining 2022-yil 12-aprel kunidagi “Yo‘l harakati qoidalarini tasdiqlash to‘g‘risidagi” 172-son qaroriga muvofiq, fuqarolarning, ayniqsa, bolalarning yo‘l-transport hodisalari hamda oqibatlaridan himoyalanganligini taʼminlash maqsadida sutkaning qorong‘i vaqtida va yetarlicha ko‘rinmaydigan sharoitda yo‘lni kesib o‘tishda va yo‘l yoqalaridan yoki qatnov qismining chetidan harakatlanishda, piyodalarning ustki kiyimida nur qaytaruvchi elementlar bo‘lishi inson hayotini saqlab qolish uchun muhim ekanligini keng targ‘ib qilish bo‘yicha manzilli chora-tadbirlarni amalga oshirilishi belgilangan bo‘lib, yaʼni ushbu norma tavsiyaviy ahamiyatga ega ekanligi keltirilgan.
Shuningdek, Yo‘l harakati qoidalarining 167-bandiga ko‘ra, velosiped yo‘lkasi bo‘lmagan holda yo‘lning qatnov qismida harakatlanayotgan velosipedchilar sutkaning qorong‘i vaqtida va yetarlicha ko‘rinmaydigan sharoitda nur qaytargichli kamzulda yoki nur qaytaruvchi elementli parchalari bo‘lgan ustki kiyimda bo‘lishi shartligi belgilangani aytilgan.
“Jamoatchilik va OAVdan turli taxmin va mish-mishlardan iborat axborotni tarqatmasliklarini so‘raymiz”, — deyiladi YHXX xabarida.
Adliya vazirligi tushintirishiga ko'ra, mazkur talab boshqa shaxslarga, shu jumladan piyodalar uchun majburiy emas, tavsiyaviy xarakterga ega.
Shuningdek, qonunchilikda Ichki ishlar vazirligi tomonidan piyodalarning qorong‘ida harakatlanayotganda nur qaytaruvchi ustki kiyimda bo‘lishini targ‘ib qilish yo‘l transport hodisalarining oldini olishda muhim vazifalardan biri ekanligi qayd etilgan.
Izoh (0)