Germaniya Qurolli kuchlari — Bundesver mamlakat mudofaa salohiyatini mustahkamlash maqsadida “Rheinmetall” kompaniyasidan qiymati 770 million yevroga teng bo‘lgan xaridni amalga oshirdi. Bu haqda Euronews xabar berdi.
Savdo shartnomasiga ko‘ra, kompaniya armiyaga 1400 ga yaqin harbiy logistika transportini taqdim etadi. Buyurtma tarkibiga 963 dona konteyner almashtirish imkoniga ega transport vositalari (swap-body systems) va 425 ta zirhsiz yuk mashinalari (UTV) kiradi. UTVlar nisbatan kam xavfli hududlarda foydalanishga mo‘ljallangan.
“Rheinmetall” vakili va harbiy transport bo‘limi boshqaruvi raisi Andre Bartel bayonotda quyidagilarni ta’kidladi:
“Bundesverning ishonchli hamkori sifatida qo‘shimcha transport vositalarini yetkazib berayotganimizdan mamnunmiz. Bu harbiy kuchlar harakatchanligi va jangovar tayyorgarligini oshirishga xizmat qiladi”.
Qo‘shimcha qilinishicha, buyurtmalar 2025-yil oxirigacha yetkazib beriladi, hisob-kitob esa 2025-yilning uchinchi choragida amalga oshirilishi rejalashtirilgan.
Ukrainadagi urush fonida mudofaa sohasiga e’tibor kuchaygan
Rossiyaning Ukrainaga bostirib kirishi Yevropada harbiy texnika va uskunalarga bo‘lgan talabni keskin oshirib yubordi. Ayniqsa, “Rheinmetall” kompaniyasining aksiyalari 2025-yil boshidan beri 190 foizga oshgani bunga yaqqol misoldir.
AQSH prezidenti Donald Tramp ham Yevropa davlatlarini mudofaa salohiyatini oshirishga chaqirmoqda. Shu sababli Germaniya o‘zining qat’iy byudjet tartib-qoidalarini yumshatishga va harbiy xarajatlarni oshirishga kirishgan.
YIMning 3,5 foizi mudofaa uchun ajratiladi
Germaniya Bundesverning texnologik yangilanishiga jiddiy e’tibor qaratmoqda. Xususan, Berlin 2029-yilgacha mudofaa xarajatlarini yalpi ichki mahsulotning 3,5 foizigacha oshirishni rejalashtirgan. Shuningdek, NATO ham 2035-yilgacha a’zo davlatlardan mudofaa xarajatlarini YIMning 5 foizigacha ko‘paytrishni talab qilmoqda. Bu esa Yevropa bo‘ylab qurol-yarog‘ ishlab chiqaruvchi kompaniyalarga yangi imkoniyatlar ochib beradi.
Izoh (0)