Shavkat Mirziyoyev 1-mart kuni Amerika Qo‘shma Shtatlari davlat kotibi Entoni Blinken boshchiligidagi delegatsiyani qabul qildi. Bu haqda prezident matbuot xizmati xabar berdi.
Xabarga ko‘ra, siyosiy, savdo-iqtisodiy, investisiyaviy, taʼlim va madaniy-gumanitar sohalardagi ikki tomonlama munosabatlar kun tartibidagi dolzarb masalalarning keng doirasi hamda mintaqaviy hamkorlikning muhim jihatlari ko‘rib chiqildi. Suhbat avvalida davlat kotibi Entoni Blinken prezidentga Jo Baydenning salomi va tilaklarini yetkazdi.
AQSH O‘zbekistonning mustaqilligi, suvereniteti va hududiy yaxlitligini doimo qo‘llab-quvvatlashda qatʼiy ekani yana bir bor qayd etildi. Mamlakatda amalga oshirilayotgan demokratik yangilanishlar, ijtimoiy-iqtisodiy islohotlarga yuksak baho berildi, ular to‘liq qo‘llab-quvvatlandi. Inson huquqlari va gender tenglikni taʼminlashda, majburiy mehnatga qarshi kurashishda, so‘z erkinligi va ommaviy axborot vositalarini qo‘llab-quvvatlash borasidagi islohotlarda, fuqarolik jamiyati institutlarini rivojlantirishda va ko‘plab boshqa yo‘nalishlarda erishilgan katta muvaffaqiyatlar alohida qayd etildi.
Qayd etilishicha, savdo-iqtisodiy, investision va innovasion hamkorlikni rivojlantirish, Amerika yetakchi kompaniyalarining O‘zbekiston bozoridagi faoliyatini kengaytirish, kooperatsiya loyihalarini, eng avvalo, yuqori texnologik tarmoqlarda amalga oshirishga alohida eʼtibor qaratildi.
Madaniy-gumanitar aloqalarni, shu jumladan, mamlakatimizda yoshlarga ingliz tilini o‘qitish va malakali o‘qituvchilarni tayyorlash dasturlarini faollashtirish uchun keng imkoniyatlar mavjudligi taʼkidlandi.
Mintaqaviy hamkorlikning eng muhim masalalari yuzasidan fikr almashildi. “AQSH va Markaziy Osiyo mamlakatlari” (“S5+1”) formatida o‘tgan vazirlar uchrashuvining amaliy natijalari ijobiy baholandi. Mintaqa mamlakatlarining barqaror taraqqiyotiga ko‘maklashish, ishbilarmonlik va investitsiya muhitini takomillashtirish, “yashil” energetikani rivojlantirish, qo‘shma taʼlim dasturlarini amalga oshirish kabi yo‘nalishlar ko‘rsatib o‘tildi. Samarqand shahrida o‘tkaziladigan Savdo va investisiyalar bo‘yicha hadli bitim (TIFA) yig‘ilishiga muhim ahamiyat berilmoqda.
Shuningdek, Afg‘onistonda tinchlik o‘rnatish borasida keng xalqaro hamkorlikka oid masalalar ham ko‘rib chiqildi. Ushbu mamlakatdagi vaziyatning keskinlashishiga va gumanitar inqirozning avj olishiga yo‘l qo‘yib bo‘lmasligi, mavjud muammolarni hal qilish algoritmini ishlab chiqish uchun BMT maydonidan faol foydalanish zarurligi, shuningdek, tinchlik jarayoniga va Afg‘oniston iqtisodiyotini tiklashga ko‘maklashish uchun mintaqaviy infratuzilma loyihalarini qo‘llab-quvvatlash muhimligi to‘g‘risida yakdil fikr bildirildi.
Izoh (0)