Turkiyada qutqaruvchilar 27-fevral kuni 21 kun davomida vayronalar ostida qolib ketgan otni qutqarib oldi. Bu haqda “Komsomolskaya Pravda” xabar berdi.
Uch hafta davomida vayronalar ostida qolgan ot qutqarilishi aks etgan kadrlar e’lon qilindi. Ot mamlakat janubi-sharqidagi Adiyaman shahrida vayron bo‘lgan hududlarni ko‘zdan kechirish paytida aniqlangan. Kadrlarda vayronalar ostidan ot qanday chiqarilayotgani aks etgan.
Hayvon uzoq vaqt davomida oziq-ovqat va suvsiz bo‘lishiga qaramay, vayronalar ostida tirik qolgan. U allaqachon egasiga qaytarilgan. Qahramonmarash shahrida vayron bo‘lgan bino o‘rnida olib borilgan qazishmalar chog‘ida mushuk ham qutqarib olingan.
6-fevral kuni Turkiyada 7,7 va 7,6 magnitudali ikkita zilzila qayd etildi. 23-fevral holatiga ko‘ra, tabiiy ofat qurbonlari soni 43,5 ming kishidan oshgan. Keyinroq, 20-fevral kuni mamlakatda 6,4 va 5,8 magnitudali yangi zilzilalar sodir bo‘ldi va Hatay viloyatida vayronagarchiliklar qayd etildi. 27-fevral kuni esa Malatya viloyatida yana 5,6 magnitudali zilzila qayd etildi.
Izoh (0)