Rossiya prezidenti matbuot kotibi Dmitriy Peskov AQSH davlat kotibi Entoni Blinkenning Qozog‘iston va O‘zbekistonga tashrifiga munosabat bildirdi. Bu haqda “TASS” xabar berdi.
Peskov Rossiya Markaziy Osiyo davlatlari bilan faol hamkorlik qilishini, bu davlatlar bilan munosabatlar tashqi siyosatning ustuvor yo‘nalishi hisoblanishini ta’kidladi. Kreml rasmiysi Blinkenning Markaziy Osiyo mamlakatlariga tashrifiga batafsil izoh bermadi.
“Men AQSH davlat kotibining tashriflari haqida izoh berishni istamayman. Axir men prezident matbuot kotibiman. Bu mening Tashqi ishlar vazirligidagi hamkasblarimning vakolatiga kiradi. Umuman olganda, bizning Markaziy Osiyo davlatlari bilan o‘zimizning ikki tomonlama munosabatlarimiz bor, o‘z hamkorlik formatlariga egamiz, ularning bir qatori bilan bizni Yevrosiyo iqtisodiy hamjamiyati birlashtiradi. Biz aynan shu narsaga e’tibor qaratamiz, buni asosiy manfaatimiz deb bilamiz va tashqi siyosatdagi ustuvor vazifamiz deb hisoblaymiz”, — dedi u.
Hozirda AQSH davlat kotibi Qozog‘iston poytaxtiga ilk rasmiy tashrif bilan keldi va u yerda Markaziy Osiyo davlatlari tashqi siyosat idoralari rahbarlari bilan uchrashadi. Blinken Qozog‘iston prezidenti Qosim-Jo‘mart To‘qayev bilan ham uchrashadi. Qozog‘istondan keyin AQSH davlat kotibi Toshkentga tashrif buyuradi.
Izoh (0)