AQSH davlat kotibi Entoni Blinken Ostonaga tashrif buyurib, mamlakat prezidenti Qosim-Jo‘mart To‘qayev bilan uchrashdi. Bu haqda AQSH davlat departamenti xabar berdi.
To‘qayev AQSHning Qozog‘iston mustaqilligi, hududiy yaxlitligi va suverenitetini doimiy qo‘llab-quvvatlayotgani uchun minnatdorlik bildirdi. Siyosatchi diplomatik munosabatlar o‘rnatilganidan buyon Qozog‘iston va AQSH o‘rtasida ham ikki tomonlama, ham ko‘p tomonlama hamkorlik yo‘lga qo‘yilganini ta’kidladi.
“Tashrifingiz strategik hamkorligimizni to‘ldiradi, deb o‘ylayman. Xavfsizlik, energetika, savdo kabi ko‘plab strategik sohalarda juda yaxshi va ishonchli hamkorlik aloqalarini o‘rnatdik”, — dedi Qozog‘iston prezidenti.
Bunga javoban Entoni Blinken Ostonada ekanidan mamnunligini bildirdi va tashrifni intiqlik bilan kutganini ta’kidladi.
“Bu tashrifni juda intiqlik bilan kutgandim. Albatta, ikki tomonlama miqyosda hamkorligimizni chuqurlashtirish va mustahkamlash borasida 30 yil davomida amalga oshirilgan ajoyib ishlarga tayanish muhim. O‘ylaymanki, so‘nggi ikki yil ichida bu yo‘nalishda muhim qadam tashladik. Aloqalar kuchli; u faqat kuchayadi. Biz bunga sodiqmiz.
Umid qilamanki, hamkasblarimiz, tashqi ishlar vazirlari bilan birgalikda mintaqani birlashtirish, yanada mustahkam aloqa o‘rnatish, yaqindan hamkorlik qilishda davom etamiz. Bu ham Markaziy Osiyo xalqlari, ham AQSH uchun foydali bo‘ladi. Biz eng yuqori darajada hamkorlik qilish niyatidamiz. Bu yerda bo‘lganimdan va hamkorligimizni mustahkamlashga hissa qo‘shayotganimdan juda mamnunman”, — dedi Entoni Blinken.
O‘z navbatida, To‘qayev AQSH prezidenti Jo Baydenga salom yo‘llab, undan uchta maktub olganini aytdi.
“Hamkorlikda ishlash borasidagi fikr-mulohazalaringizga qo‘shilaman”, — dedi To‘qayev.
Qozog‘iston rahbari AQSHning C5+1 formatida hamkorlikni kengaytirishga qaratilgan sa’y-harakatlarini olqishlab, Ostona shahrida Markaziy Osiyo davlatlari va AQSH tashqi ishlar idoralari rahbarlarining uchrashuvini o‘tkazish muhimligini qayd etdi.
Izoh (0)