Туркияда зилзиладан 21 кун ўтиб, вайроналар остидан от қутқарилди (видео) 

Туркияда қутқарувчилар 27 февраль куни 21 кун давомида вайроналар остида қолиб кетган отни қутқариб олди. Бу ҳақда “Комсомолская Правда” хабар берди.

Уч ҳафта давомида вайроналар остида қолган от қутқарилиши акс этган кадрлар эълон қилинди. От мамлакат жануби-шарқидаги Адияман шаҳрида вайрон бўлган ҳудудларни кўздан кечириш пайтида аниқланган. Кадрларда вайроналар остидан от қандай чиқарилаётгани акс этган. 

Ҳайвон узоқ вақт давомида озиқ-овқат ва сувсиз бўлишига қарамай, вайроналар остида тирик қолган. У аллақачон эгасига қайтарилган. Қаҳрамонмараш шаҳрида вайрон бўлган бино ўрнида олиб борилган қазишмалар чоғида мушук ҳам қутқариб олинган.

6 февраль куни Туркияда 7,7 ва 7,6 магнитудали иккита зилзила қайд этилди. 23 февраль ҳолатига кўра, табиий офат қурбонлари сони 43,5 минг кишидан ошган. Кейинроқ, 20 февраль куни мамлакатда 6,4 ва 5,8 магнитудали янги зилзилалар содир бўлди ва Ҳатай вилоятида вайронагарчиликлар қайд этилди. 27 февраль куни эса Малатя вилоятида яна 5,6 магнитудали зилзила қайд этилди.