Musulmonlar idorasi raisi, muftiy Nuriddin domla vazifasiga vijdonan yondashmagan bir necha imom-xatibni ishdan oldi. Bu haqda Musulmonlar idorasi axborot xizmati xabar berdi.
Xabarga ko‘ra, 28-fevral kuni Musulmonlar idorasi raisi, muftiy Nuriddin domla raisligida respublika diniy soha xodimlarining tanqidiy-tahliliy videoselektor yig‘ilishi bo‘lib o‘tdi. Yig‘ilishda 2022-yil davomida masjidlar imom-xatiblari, imom-noiblari, mudarrislar va otinoyilar tomonidan amalga oshirilgan ishlar sarhisob qilindi. Shuningdek, ayrim diniy soha xodimlari tomonidan yo‘l qo‘yilgan xato va kamchiliklarni isloh qilish masalalari ko‘rib chiqildi.
Yig‘ilish jarayonida mehnat intizomiga rioya etmagan, vazifasiga vijdonan yondashmagan, mo‘min-musulmonlar ehtiyojini qondirishga jiddiy sa’y-harakat qilmagan va diniy soha xodimi maqomiga munosib bo‘lmagan 1 nafar viloyat bosh imom-xatibi o‘rinbasari, 2 nafar tuman bosh imomi va 1 nafar imom-xatib ishdan olindi va 4 nafariga hayfsan intizomiy jazosi e’lon qilindi. Jumladan, Surxondaryo viloyati bosh imom-xatibi o‘rinbosari Fatullayev Abdusalom, Surxondaryo viloyati Qumqo‘rg‘on tumani bosh imomi va “Shoh Mashrab” masjidi imom-xatibi Hafizullo Zayniyev, Samarqand viloyati Oqdaryo tumani bosh imom-xatibi Abloqulov Habibulla va Xorazm viloyati Shovot tumani “Xo‘roz Eshon bobo” masjidi imom-xatibi Ro‘zmetov Davronbek yig‘ilishda egallab turgan vazifalaridan ozod etildi.
Shuningdek, Jizzax viloyati bosh imom-xatibi Mehmonali Jabborov, Jizzax shahar bosh imom-xatibi Faxriddin Shayzaqov, Toshkent viloyati “Rahbar ota Akbar o‘g‘li” masjidi imom-xatibi Rahmanov Muhammadiy va Farg‘ona viloyati So‘x tumani “Oftobro‘y” masjidi imom-noibi Ilhomiddin Toirovga hayfsan intizomiy jazosi berildi. Bundan tashqari, Toshkent shahri “al-Hudaybiya” masjidi imom-noibi Shuhrat Ziyayev mehnat intizomiga rioya etmagani uchun chora sifatida boshqa ishga o‘tkazildi.
Ish faoliyatdagi xato-kamchiliklar sababli 2022-yilda 25 nafar imom-xatib, 19 nafar imom-noibi va 2 nafar muhtasib vazifasidan ozod etilgani, shuningdek, 56 nafar imom-xatib va imom noibiga hayfsan intizomiy chorasi berilgani ma’lum qilindi.
Izoh (0)