Toshkent viloyati O‘rta Chirchiq tumanida erkak kelishmovchilik sabab onasini uyga kiritmadi. Bu haqda MIB axborot xizmati “Daryo”ga xabar berdi.
Xabarga ko‘ra, 27-fevral kuni YouTube ijtimoiy tarmog‘ida “MIB noqonuniy tarzda fuqaroning uyiga tajovuz qilmoqda” nomli byuroning O‘rta Chirchiq tuman bo‘limi xodimlari tomonidan majburiy ko‘chirish harakati olib borayotgani haqida videoxabarlar joylashtirildi.
Fuqarolik ishlari bo‘yicha O‘rta Chirchiq tumanlararo sudining 2022-yil 10-avgustdagi ijro varaqasiga asosan qarzdor D.S.dan undiruvchi P.A.ni (ona va bola) O‘rta Chirchiq tumani, “Turkiston” MFY, Turkiston ko‘chasidagi xonadonlarning biriga barcha yordamchi binolar va kommunal xizmatlardan foydalanish huquqi bilan yashash uchun kiritish to‘g‘risidagi ijro hujjati bo‘lim ish yurituviga 2023-yil 7-yanvar kuni kelib tushgan. Shu kuni ijro ishi yuritishni qo‘zg‘atish to‘g‘risidagi qaror qabul qilingan.
Ijro hujjatining ijrosini taʼminlash maqsadida 24-fevralda tegishli tashkilotlarga undiruvchi P.A.ni ijro hujjatida ko‘rsatilgan manzilga majburiy tartibda kiritish to‘g‘risida talabnoma berilgan. 27-fevral kuni O‘rta Chirchiq tumani, “Turkiston” MFY, Turkiston ko‘chasi 59-uyga xolislar hamda tegishli tashkilotlar xodimlari bilan chiqilganda xonadon eshiklari qulflangani aniqlanib, ijro harakatlari keyinga qoldirilgani to‘g‘risida dalolatnoma rasmiylashtirildi.
Izoh (0)