O‘zbekiston davlat jismoniy tarbiya va sport universitetining Farg‘ona filialida 2022/2023-o‘quv yilida imtihon natijalari o‘zgartirilib, abituriyentlar qasddan yiqitilgani ma’lum bo‘ldi. Bu haqda Bosh prokuratura matbuot xizmati xabar berdi.
Qayd etilishicha, O‘zbekiston davlat jismoniy tarbiya va sport universitetining Farg‘ona filialida o‘tkazilgan kasbiy (ijodiy) imtihon natijalari o‘rganilib, 356 nafar (shundan, qo‘shilgan 322, kamaytirilgan 34) abituriyentlarning haqiqatan to‘plagan ballariga soxta yozuvlar kiritish orqali, yuqori ball to‘plagan abituriyentlarning talabalikka tavsiya etilmay qolingani aniqlangan.
Jumladan, velosport yo‘nalishida abituriyent D.Bakirovning haqiqatan to‘plagan 105,2 balli soxtalashtirilib, Davlat test markazining elektron maʼlumotlar bazasiga pasaytirilgan 67,4 ball kiritilishi oqibatida talabalikka tavsiya etilmagan.
Viloyat prokuraturasi tomonidan 2022-yil 10-dekabrda Bosh prokuratura orqali Taʼlim muassasalariga o‘qishga qabul qilish Davlat komissiyasi raisiga xat kiritilib, unda idoralararo ishchi guruhi tuzilgan holda O‘zbekiston davlat jismoniy tarbiya va sport universitetining Farg‘ona filialida o‘tkazilgan kasbiy (ijodiy) imtihon natijalarini qayta ko‘rib chiqish va natijasi bo‘yicha taklif kiritish so‘ralgan.
Shunga ko‘ra, maʼsul vazirliklarning mutaxassislaridan iborat tarkibda idoralararo ishchi guruhi tuzilib, har bir abituriyentning natijalari qayta ko‘rib chiqilgan va 145 nafari asossiz ravishda talabalikka qabul qilinmasdan qolgani aniqlangan.
O‘rganish natijalari 2023-yili 14-fevral kuni komissiya majlisida muhokama qilinib, yuqoridagi 145 nafar (3 nafar davlat granti va 142 nafar to‘lov-kontrakt) abituriyentlarni talabalikka tavsiya etish haqida qaror qabul qilingan.
Ushbu qarorga asosan filial direktorining 16-fevraldagi 10, 31 va 32-sonli buyruqlari bilan yuqoridagi 145 nafar abituriyent talabalikka qabul qilinib, ularning buzilgan huquqlari tiklandi.
Yoshlar huquqlarini buzgan filialning sobiq direktori R.Rasulov va qabul komissiyasi masʼul kotibi M.Muxriddinovga nisbatan Jinoyat kodeksining 205-moddasi (Hokimiyat yoki mansab vakolatini suiiste’mol qilish) 1-qismi va boshqa moddalari bilan jinoyat ishi qo‘zg‘atilgan.
Izoh (0)