O‘zbekistonda endilikda tibbiyot muassasalari faoliyati yangicha tizim asosida baholab boriladi. Bu haqda Sog‘liqni saqlash vazirligi axborot xizmati xabar berdi.
Xabarga ko‘ra, sog‘liqni saqlash vaziri boshchiligida vazirlik markaziy apparati masʼul xodimlari, ixtisoslashtirilgan markazlar, tibbiyot oliy o‘quv yurtlari va hududiy boshqarmalar rahbarlari ishtirokida yig‘ilish bo‘lib o‘tdi. Unda tizimda ijro intizomi, Qashqadaryo viloyatida tibbiyot sohasida amalga oshirilayotgan ishlar natijadorligi hamda ixtisoslashtirilgan markazlar faoliyatini muvofiqlashtirish boshqarmasi tomonidan amalga oshirilayotgan ishlar, bu yo‘nalishdagi muammolar va ularning amaliy yechimlari muhokama qilindi.
Tahlillar avvalida vazir 4 ta yo‘nalish — 208 ta tuman (shahar) tibbiyot birlashmasi, 14 ta hududiy sog‘liqni saqlash boshqarmasi, 23 ta ixtisoslashtirilgan tibbiyot markazi, sohaga qarashli 11 ta oliy taʼlim muassasasida KPI tizimi joriy etilishini taʼkidladi.
Bunda hududlarda onalar va bolalar o‘limiga barham berish, har bir tumanda yil davomida 10 ta yangi davolash va 12 ta zamonaviy diagnostika usullarini tatbiq etish, tibbiyot yo‘nalishida investisiya va grant mablag‘larini jalb etish, davolash-porfilaktika muassasalariga quyosh panellarini o‘rnatish, davlat-xususiy sheriklik loyihalari hamda xizmatlarni autsorsing orqali amalga oshirish kabi mezonlar asos qilib olinadi.
Unga ko‘ra, har chorakda yuqoridagi muassasalar va ularning rahbarlari faoliyati KPI tizimi bo‘yicha baholab boriladi. Tibbiy turizmni rivojlantirish bo‘yicha ham yangi tizim yo‘lga qo‘yilishi qayd etildi. Shundan so‘ng Qashqadaryo viloyati sog‘liqni saqlash boshqarmasi hamda vazirlikning Ixtisoslashtirilgan markazlar faoliyatini muvofiqlashtirish boshqarmasi boshlig‘ining taqdimotlari bo‘lib o‘tdi. Vazir har ikki taqdimot talabga javob bermasligini taʼkidlab, ushbu rahbarlar topshiriq ijrosiga yuzaki, masala mohiyatini chuqur his etmay yondashganini tanqid ostiga oldi.
Xususan, Qashqadaryo viloyati bo‘yicha taqdimotda tibbiyotning birlamchi bo‘g‘inini takomillashtirish va aholiga yanada yaqinlashtirish bo‘yicha aniq strategiya, kasalliklar balansi, tumanlar kesimida davolash yo‘lga qo‘yilmagan xastaliklar nozologiyasi, joriy etilishi mo‘ljallangan noyob va murakkab diagnostika hamda davolash usullari aniq va manzilli aks ettirilmagan.
Xuddi shunday, ixtisoslashtirilgan tibbiyot markazlari faoliyatini takomillashtirishga bag‘ishlangan taqdimotda ham baʼzi turdagi noyob kasalliklar tufayli xorijda davolanishga ehtiyoji bor bemorlar statistikasi, bu muammoni hal etishning aniq yechimlari, o‘z vertikali bo‘yicha ishni tashkil qilish prinsipi, mexanizmi o‘rganilmagan, tahlil qilinmagan va ko‘rsatib berilmagan.
Izoh (0)