Toshkentning Sergeli tumanida tez yordam haydovchisi kaltaklandi. Holat aks etgan video ijtimoiy tarmoqlarda tarqaldi.
Poytaxt IIBB matbuot xizmatining ma’lum qilishicha, 27-fevral kuni taxminan soat 03:30 larda Sergeli tumani, Sergeli-4 dahasida istiqomat qiluvchi ayol A.A. “103” raqamiga qo‘ng‘iroq qilib, tez tibbiy yordam ko‘rsatish brigadasini chaqirgan.
Chaqiruvga binoan yetib kelgan tez tibbiy yordam xizmati feldsheri X.O. xonadonga kirib ayolni birlamchi ko‘rikdan o‘tkazish vaqtida, uning yonida bo‘lgan tanish erkak — 1990-yilda tug‘ilgan K.A. feldsher go‘yoki ayolga yaxshi qaramayotganini bildirib, feldsherga kuch ishlatish bilan tahdid qilgan.
Feldsher undan qochib ko‘chaga chiqqan vaqtida tez tibbiy yordam mashinasi haydovchisi — 1970-yilda tug‘ilgan T.S. feldsher ayolni himoya qilgan. Shu vaqtda K.A. jamoat tartibini buzib, tez yordam haydovchisini urib, tan jarohati yetkazgan.
Sog‘liqni saqlash vazirligining ma’lum qilishicha, oqibatda jabrlangan tez tibbiy yordam haydovchisi Respublika shoshilinch tibbiy yordam ilmiy markaziga olib borilgan. Tekshiruvlar natijasida u bosh miya yopiq jarohati, bosh miya chayqalishi, burun suyagining sinishi, burun yumshoq to‘qimalarining lat yeyishi dastlabki tashxisi bilan neyroxirurgiya bo‘limiga yotqizilgan.
Hozir bemor belgilangan standartlar asosida tibbiy muolajalarni olmoqda.
Mazkur holat yuzasidan Sergeli tumani IIO FMB huzuridagi Tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Tergov davom etmoqda.
Izoh (0)