Ўзбекистонда эндиликда тиббиёт муассасалари фаолияти янгича тизим асосида баҳолаб борилади. Бу ҳақда Соғлиқни сақлаш вазирлиги ахборот хизмати хабар берди.
Хабарга кўра, соғлиқни сақлаш вазири бошчилигида вазирлик марказий аппарати масъул ходимлари, ихтисослаштирилган марказлар, тиббиёт олий ўқув юртлари ва ҳудудий бошқармалар раҳбарлари иштирокида йиғилиш бўлиб ўтди. Унда тизимда ижро интизоми, Қашқадарё вилоятида тиббиёт соҳасида амалга оширилаётган ишлар натижадорлиги ҳамда ихтисослаштирилган марказлар фаолиятини мувофиқлаштириш бошқармаси томонидан амалга оширилаётган ишлар, бу йўналишдаги муаммолар ва уларнинг амалий ечимлари муҳокама қилинди.
Таҳлиллар аввалида вазир 4 та йўналиш — 208 та туман (шаҳар) тиббиёт бирлашмаси, 14 та ҳудудий соғлиқни сақлаш бошқармаси, 23 та ихтисослаштирилган тиббиёт маркази, соҳага қарашли 11 та олий таълим муассасасида KPI тизими жорий этилишини таъкидлади.
Бунда ҳудудларда оналар ва болалар ўлимига барҳам бериш, ҳар бир туманда йил давомида 10 та янги даволаш ва 12 та замонавий диагностика усулларини татбиқ этиш, тиббиёт йўналишида инвестисия ва грант маблағларини жалб этиш, даволаш-порфилактика муассасаларига қуёш панелларини ўрнатиш, давлат-хусусий шериклик лойиҳалари ҳамда хизматларни аутсорсинг орқали амалга ошириш каби мезонлар асос қилиб олинади.
Унга кўра, ҳар чоракда юқоридаги муассасалар ва уларнинг раҳбарлари фаолияти KPI тизими бўйича баҳолаб борилади. Тиббий туризмни ривожлантириш бўйича ҳам янги тизим йўлга қўйилиши қайд этилди. Шундан сўнг Қашқадарё вилояти соғлиқни сақлаш бошқармаси ҳамда вазирликнинг Ихтисослаштирилган марказлар фаолиятини мувофиқлаштириш бошқармаси бошлиғининг тақдимотлари бўлиб ўтди. Вазир ҳар икки тақдимот талабга жавоб бермаслигини таъкидлаб, ушбу раҳбарлар топшириқ ижросига юзаки, масала моҳиятини чуқур ҳис этмай ёндашганини танқид остига олди.
Хусусан, Қашқадарё вилояти бўйича тақдимотда тиббиётнинг бирламчи бўғинини такомиллаштириш ва аҳолига янада яқинлаштириш бўйича аниқ стратегия, касалликлар баланси, туманлар кесимида даволаш йўлга қўйилмаган хасталиклар нозологияси, жорий этилиши мўлжалланган ноёб ва мураккаб диагностика ҳамда даволаш усуллари аниқ ва манзилли акс эттирилмаган.
Худди шундай, ихтисослаштирилган тиббиёт марказлари фаолиятини такомиллаштиришга бағишланган тақдимотда ҳам баъзи турдаги ноёб касалликлар туфайли хорижда даволанишга эҳтиёжи бор беморлар статистикаси, бу муаммони ҳал этишнинг аниқ ечимлари, ўз вертикали бўйича ишни ташкил қилиш принципи, механизми ўрганилмаган, таҳлил қилинмаган ва кўрсатиб берилмаган.
Изоҳ (0)