Xorijlik mashhur kishilarga uyushtirilgan suiqasdlar haqida ko‘p eshitamiz. Afsuski, ayrim o‘zbek sanʼatkorlari ham bunday ko‘ngilsiz vaziyatga tushishgan. Yaxshi hamki, g‘araz niyatdagi insonlar maqsadida yetolmagan va qonun oldida javob berishgan.
Yulduz Usmonova: “Pistolet tirab, ulush so‘rashardi”
Foto: “Daryo”
— To‘ylarda pichoq tiragan, pistolet o‘qtalgan paytlari juda ko‘p. Hatto, “Xalqlar do‘stligi” sanʼat saroyida konsert beradigan kunim kelib, “Ulush berasan, bo‘lmasa otaman”, deb ham qo‘rqitishgan. Ularga “Yo‘q bermayman”, deb bo‘lmasdi. “Ho‘p boshlig‘ing kim, uchrashtir”, derdim. Osonlikcha taslim bo‘lmasdim. U paytda mushtumzo‘rlar juda ko‘p edi. Seni kislotaga tashlaymiz, deb qo‘rqitishlar ham bo‘lgan. Juda qoidasiz, qiyin vaqtlar edi, — deydi xonanda Yulduz Usmonova.
Osman Navro‘zov: “To‘yxonada belimga pichoq tirab turdi”
— Hali qo‘shiqlarim ommalashmagan paytlar edi. To‘yimga ikki oy qolganida bir to‘yga borganman va tanishimning uyida tushlik qilganman. U biroz sarxush edi, telefonda xuddi videoga olgandek hazil qildim. Kechga yaqin to‘y boshlanganida uni nima jin urdi bilmadim, yonimga pichoq ko‘tarib keldi. Pichoqni belimga tirab turib oldi. Sarxusht deb tinchlantirishga harakat qildim, odamlar uni davradan olib chiqib ketishdi. Oradan ikki oyga yaqin vaqt o‘tib, uning mahallasidagi to‘yda bordik. U davraga kelib, yana qiliq ko‘rsata boshladi. Keyin menga yaqinlashib, yuzimga musht tushirdi. Qo‘lida katta yuziga bo‘lgani uchunyuzim shilinib, burnimdan tirqirab qon oqdi. Og‘riqning zo‘ridan bir ko‘zimni yuvib, to‘yxonadan chiqib ketdim. Odamlar oldida shunday qilgani uchun to‘g‘ri ichki ishlar bo‘limiga borib, ariza yozib berdim. Ish sudga oshdi, aynan to‘yim arafasida sudga qatnab yurdim. Ammo ota-onam unga jazo berilishini istashmadi. “Alloh jazosini bersin, qamatib nima qilasan?” deyishdi. Uning yosh bolalari borligini bilardim. Otasining axmoqligi uchun bir umr qaddi bukilib yashashlarini istamadim, — deydi Osman Navro‘zov.
Mirzabek Holmedov: “To‘pponcha tirab, to‘yiga olib bormoqchi bo‘lgan”
— To‘ylar bilan bog‘liq ko‘plab qiziqarli voqealar bo‘lgan. Hozir-ku san’atkorlar to‘yga emin-erkin borib kelishadi. Avvallari esa to‘yda xonanda yoki qiziqchiga qitmirlik qilish odatga aylangandi. Mushtumzo‘rlar to‘y yakunida istagan xurmacha qilig‘ini qilardi. Mast-alastga aka, sizniki to‘g‘ri, deb turishdan boshqa iloj yo‘q edi. Eng yomoni, 1988—1989-yili to‘pponcha bilan qo‘rqitish urf bo‘lgan. Bir kuni to‘yda xizmat qilayotgan ikki erkak kelib, chetroqqa o‘ting, gap bor, degan. Ular meni o‘zlari bilan boshqa to‘y xizmatiga olib borishni istashgan ekan. Yo‘q, xizmatdaman, deyishim bilan kostyumining ichki cho‘ntagidan to‘pponcha ko‘rsatgan. Xullas, shunday to‘ylarda pishib, Mirzabek Xolmedov bo‘lganman, — deydi qiziqchi.
Ozoda Nursaidova: “Sahnaga yog‘ surtib ketishdi”
— Hayotimda kutilmagan sarguzashtlar hamisha bo‘ladi. Bunga o‘rganib ham qolganman. O‘tgan yilgi yakkaxon konsert dasturimning to‘rtinchi kuni g‘aroyib voqea sodir bo‘ldi. Sahnada aynan men harakatlanadigan joyga yog‘ surtib qo‘yilgan ekan. Yaxshiki, biror ko‘ngilsizlik sodir bo‘lmasin avval buning oldi olindi. Bu kasallik, hechqisi yo‘q. Eng muhimi muxlislarimning mehri. Ular qo‘llari bunday “sarguzashtlar” taʼsir qilmaydi, — deydi xonanda Ozoda Nursaidova.
Janob Rasul: “O‘ligimiz kimgadir kerak bo‘lgan”
— 2019-yili to‘ydan qaytayotganimizda juda g‘alati voqea sodir bo‘lgan. O‘shanda Alloh bizni bir o‘limdan saqlagan. Xullas, to‘ydan yaxshi kayfiyatda chiqib, Buxoroning “betonka” yo‘lida ketayotgandik. Bu yo‘l tekis bo‘lgani uchun mashinamiz 150-170 km tezlikda harakatlanardi. Birdan mashinamiz qattiq silkindi. Qo‘rqib, mashinani to‘xtatganmiz. Qarasak, orqa ballon qiyshayib qolgan va ballonni mustahkamlovchi 5 ta boltdan 3 tasi chiqib ketgan bo‘lgan. Aslida u mashinaning ballonini bo‘shatish oson emasdi. Uni biladigan odam xizmatda ekanimizdan foydalanib shunday qilgan, deb gumon qilgandik. “Agar o‘sha ikkita bolt ham chiqib ketganida, mashina ag‘darilardi. Xudo sizlarni asrabdi”, deyishgan mashina ustalari. O‘ligimiz kimgadir kerak bo‘lgan, — deydi xonanda Janob Rasul.
Munisa Rizayeva: “Pichoqni ko‘rib, qo‘rqib ketdim…”
.jpg)
— To‘yda qiziqarli voqealar bilan birga xavfli vaziyatlar ham bo‘ladi. Chunki kimning nima maqsadda ekanligini bilmaysiz. Keyingi paytlarda yoshlar orasida pichoqbozlik holatlari ko‘payib ketgan. Ilgari yigitlar urishish paytda pichoq chiqarishsa, “O‘zing urisholmaysanmi?” deb mazax qilishardi. Hozir aksincha, oldida pichoq olib borish obro‘dek bo‘lib qolgan. Yaxshi hamki, bunday vaziyatlarning oldini oladigan, ularga qarshi chora ko‘radigan ichki ishlar xodimlari bor. Ikki marta qo‘riqchimni pichoqlashgan. Bittasining oyoqlariga tiqilgan pichoqni ko‘rib, qo‘rqib ketganman. Yaxshiyamki, ularni tezda kasalxonaga olib borganmiz. Bu ishni qilganlar esa tegishli tartibda javobgarlikka tortilgan. Bunday vaziyatlarga ko‘p uchraganim uchun ko‘nglim bo‘lmagan to‘yxonada qo‘shiq kuylamayman. Chunki ko‘nglim bo‘lmay kirgan to‘yxonada mushtlashuv yoki hech bo‘lmaganda chiroq o‘chishi bilan bog‘liq vaziyat bo‘ladi, — deydi xonanda Munisa Rizayeva.
Ozod Hurramovga kim kislota sepmoqchi bo‘lgan?
— Bir kuni reklama bo‘yicha uchrashish kerakligini aytishdi. Kelishilgan joyga yaqin do‘stlarim bilan bordim. Keyin bilsam ular bir o‘zim kelishimni reja qilishgan va mashinaga “bosib” qayergadir olib ketishmoqchi bo‘lgan ekan. Keyin qizlar men bilan rasmga tushishayotganda bir yigit chekkada turganini ko‘rib qoldim. Unga eʼtibor bersam sumkasidan “baklajka”da nimadir oldi. “O‘tiringlar” deb o‘zim cho‘kkalab oldim. U yigit qo‘lidagini otib qochib qoldi. Keyin “baklajka”ni borib hidlasak, kislata. Keyin ularning maqsadini angladim. Alloh asradi, — deydi bloger Ozod Hurramov.
Izoh (0)