Malibu oynasini sindirgan Durdona Qurbonova, Shohjahon Jo‘rayevdan ranjigan Dilfuza Ismoilova, Halima Ibragimovani “tepgan” Ahad Qayum. 2021-yilda internetda “shovqin ko‘targan” shou-biznes vakillari

Shou-biznes vakillari uchun muxlislar va OAV e’tiborini tortish suv va havodek zarur, desak, mubolag‘a bo‘lmaydi. Ayrim xonandalar yoki aktyorlar o‘zlari haqida gapirishlari uchun hamma narsaga tayyor. Hattoki, ijtimoiy tarmoqlar orqali kelishilgan janjallar tashkillashtirish ham keyingi paytda urfga kirgan. Quyida 2021-yilda muxlislari o‘rtasida eng ko‘p muhokama qilingan shou-biznes vakillari sanab o‘tiladi.

Ahad Qayum va Aziz Rametovning janjali IIVda yakun topdi.

Ahad Qayum va Aziz Rametov o‘rtasidagi mojorolar Amirxon Umarovning “Ochiqchasiga gaplashamiz” tok-shousidan keyin avj oldi. O‘sha ko‘rsatuvda san’atdagi nizolar va saviyasiz filmlar haqida bahs yuritilgandi. Shundan so‘ng ikki ijodkor Instagram orqali bir-biriga videomurojaat yo‘llashni boshladi. Albatta, murojaatlar shirin so‘zlar va e’tiroflardan iborat emasdi. Haqoratli murojaatlarning keti uzilmagach, 2021-yilning fevral oyida ikki ijodkor IIV chaqirilib, profilaktiv suhbat o‘tkazildi.

Unda shou-biznesning ikki vakili bir-birini qandaydir sabablar bilan haqorat, shuningdek, bir-birining “oyoq-qo‘lini sindirib, nogironlik aravachasiga mixlab qo‘yish” bilan tahdid qilganini ko‘rish mumkin.“Meni ismimni olib, bir joyda gapirgani uchun men ham ularga nisbatan ehtirosga berilib, gapirgan gaplarimdan juda ham qattiq afsusdaman. Aziz Rametovga qilgan murojaatim yoki ba’zi bir noto‘g‘ri xatti-harakatarimiz uchun ming bor uzr so‘rayman”, — deydi Ahad Qayum.

O‘z navbatida, Aziz Rametov ham o‘zining bu kabi xatti-harakatlari uchun uzr so‘ragan. “Qizishib, gapirgan gaplarim uchun uzr so‘rayman. Kuzatuvchi sifatida dili ranjigan yurtdoshlarimiz, vatandoshlarimizdan uzr so‘rayman”, — deydi aktyor.Profilaktik suhbat jarayonida ushbu shaxslar kelgusida yana fuqarolarning sha’ni va qadr-qimmatini beodoblik bilan kamsitish, OAV va internet tarmoqlari orqali tahqirlash, jamiyatda yurish-turish qoidalarini buzish kabi harakatlarni sodir etsa, ma’muriy yoki jinoiy javobgarlikka tortilishi haqida rasman ogohlantirilgan.

Janjallashib charchamaydigan Kaniza

Kaniza 2021-yilda ijodi bilan emas, ko‘proq ijtimoiy tarmoqdagi janjallari bilan e’tiborni tortdi. Uning turli-tuman mojarolari hamisha internet foydalanuvchilarining muhokama markazida bo‘ldi.

Misol uchun, Kaniza o‘tgan yili yo‘l patrul xizmati xodimi bilan bo‘lgan tortishuvi messenjerlarda rosa “aylandi”.

2021-yilda esa xonanda Luiza Rasulova va bloger Laziza bilan janjallashishga, sport zalida to‘polon ko‘tarishga ulgurdi.

Luiza Rasulova intervyularidan birida Kanizaga “keraksiz joyga burnini tiqadigan” deya ta’rif berdi.

Tabiiyki, ushbu so‘zlar Kanizani darg‘azab qildi hamda u Luiza haqida “juda ko‘p sirlarni” bilishini aytib, undan tilini tiyib yurishni so‘radi.

Fitnes zalidagi mojaroga esa u yerga qatnaydigan ayollardan biri Kanizani videoga olgani sabab bo‘lgan.

“Dizayn” kulgi jamoasi vakillarining do‘kondagi janjali

“Dizayn” kulgi jamoasi vakillari Abdurahmon Mavlonov va Sa’dulla Fathullayevning do‘konda sotuvchi bilan janjallashgani aks etgan video ijtimoiy tarmoqlarda muhokamalarga sabab bo‘ldi. Videoda qiziqchilarning do‘kon xodimi bilan avval og‘zaki, keyin esa qo‘l ko‘tarib janjallashganini ko‘rish mumkin.

Abdurahmon Mavlonov keyinroq ushbu holatga izoh berib, sotuvchining qo‘pol muomalasiga chidab tura olmagani, uning o‘rnida boshqa kishi ham xuddi shunday yo‘l tutishini aytib o‘tdi.

Dilfuza Ismoilova nega Shohjahon Jo‘rayevdan ranjidi?

2021- yilning iyun oyida Dilfuza Ismoilova YouTube tarmog‘idagi “Shox Lomak” kanaliga intervyu berdi. U suhbat davomida san’at boshqa kasblarga nisbatan osonligi va san’atkorlar o‘ynab-kulib pul topishi haqida gapirdi.

“Haqiqatan ham san’atkor dehqondek ter to‘kib ishlamaydi. San’atkor bo‘lish uchun temirdan tish kerak, deb gaplar yolg‘on”, — degan edi Dilfuza Ismoilova.Bu fikr Shohjahon Jo‘rayevning g‘azablantirdi va u Instagram orqali quyidagicha post qoldirdi.

Shundan so‘ng Dilfuza Ismoilova Shohjahon Jo‘rayevga qarata “urush” ochdi.

Oradan bir necha kun o‘tib, Shohjahon Jo‘rayev “Toshkentning sho‘x qizi”ning uyiga kelib, undan uzr so‘ragan. Hayriyatki, ikki ijodkor o‘rtasidagi ko‘ngilsizlik imi-jimida hal etildi.

Halima Ibragimova Ahad Qayumning janjali

Tinib-tinchimas Ahad Qayum qiziqchi Halima Ibragimova bilan janjallashgani haqidagi video 2021-yilning fevral oyida tarqalgandi. Haqoratli so‘zlarga boy bo‘lgan janjal potyaxtdagi restoranlarning birida sodir bo‘lgan.

“Mushtdek bola Hali deb chaqirgani asabimni buzdi. Undan keyin menga oyog‘ini ko‘tardi. Agar yigitlar yo‘limni to‘sishmaganda uni aniq dabdalasini chiqarardim. Bu video tarqalishini istamagandim. Kimdir videoni tarqatib yubordi. Ahad restorandan chiqib, mashinasiga o‘tirib qochdi. Men ayol kishi bo‘lib uning ortidan quvganim yo‘q, ammo orani ochiq qilaman. Ahad oyog‘ingni sindiraman”, — degandi Halima Ibragimova Instagram’dagi jonli efirida.

Janjalning asosiy sababi Ahad Qayum “Men endi 1 milliard so‘mga reklamaga tushaman, arzoniga ana Davron Kabulov, Munisa Rizayeva yoki Halimaxon tushsin”, degan gapi Halima Ibragimovani g‘azablantirgan.

Yil so‘ngida esa ikki ijodkor munosabatlari ancha iliqlashdi. Ular bir necha tadbirlarda birga ko‘rinish berdi.

Durdona avval Malibu old oynasini sindirdi, keyin Imrondan xafa bo‘ldi.

Aktrisa Durdona Qurbonova 2021-yilning mart oyida aktyor Sardor Ahrorovga tegishli Malibu avtomobilining old oynasini urib sindirdi hamda ijtimoiy tarmoqlar foydalanuvchilari e’tiborini tortdi. Durdona bu ishni nima uchun qilgani haqida hech qayerda gapirmadi.

Keyinroq esa Durdona ijodiy hamkori xonanda Imrondan to‘yiga aytmagani uchun xafa bo‘ldi. Shuningdek, Durdona xonanda “ehtimol ayoli ruxsat bermagani uchun uni yangi klipiga chaqirmayotganini” aytib o‘tdi.

Ushbu murojaat Imronning e’tiboridan chetda qolmadi. Oradan bir necha kun o‘tgach, Imron maxsus video suratga olib, ijtimoiy tarmoqlarga joyladi. Unda nega Durdonani to‘yga taklif etmagani, qaysi gapidan ranjigani va qo‘ng‘iroqlariga javob bermayotgani haqida aytdi.

Kamila Gimandinova va Said Muxtorovning bir-biriga deganlari

“Qadam” serialidagi roli bilan tomoshabinlarga yaxshi tanish bo‘lgan aktrisa Kamila Gimandinova YouTube’dagi “Donik shou” kanaliga intervyu berib, 14 yoshligida uni Said Muxtorov zo‘rlamoqchi bo‘lganini va u qo‘rqib ketib sumkasi bilan uni urib “O‘zbekkino”dagi ofisidan qochib ketgani haqida aytgandi.

— “U kunni eslashim qiyin. Chunki o‘sha rejissor buvimni yaxshi tanirdi, yaqinlarim unga ishonishgani uchun meni yolg‘iz jo‘natishgandi. Men o‘shanda 14 yoshda, u esa 50 yoshdan oshgandi” — degan edi Kamila Gimandinova.

Rejissor va aktyor Said Muxtorov “Chotki TV” YouTube kanaliga bergan intervyusida Kamilaning ushbu aybloviga munosabat bildirdi.

“Musulmonlarning ichida kofirona fikrlaydiganlar bor haligacha. Haligacha Amir Temurga qarshi odamlar bor. Uni bosqinchi, kallakesar deydiganlar bor. Shulardan kelib chiqib, mening u qizga aytadigan gapim: ‘Ko‘chadan tug‘gan farzandingga kelib domla azon aytgan bo‘lsa, shu bolang kun kelib senga jazongni beradi’. Bu qizga shu gapi uchun javob ham berganim yo‘q. Men uni Allohimga topshiraman. Unda na fikr bor, na isbot bor va na aql. Kim buni pesh-peshlagan? Buni ham aniqlab, joyiga qo‘yadigan Alloh. Xalqning oldida yuzim yorug‘ bo‘lib gapiraman”, — deydi Said Muxtorov.

Aziza Yoqubova erinining xiyonatini fosh qildi.

Uzoq yillar turmushga chiqqani va bir qizli bo‘lgach ajrashgani haqida ma’lumotlarni sir tutgan aktrisa Aziza Yoqubova 2020-yilning 30-sentabr kuni ikkinchi marta turmushga chiqdi. Ularning nikoh to‘yi katta shodiyonalarga boy bo‘lib, unda ko‘plab shou-biznes vakillari ishtirok etgandi. Afsuski, oradan ko‘p o‘tmay er-xotin munosabatlariga darz ketdi va mart oyida Aziza Yoqubova Instagram sahifasiga erining xiyonati haqida video joyladi.

— Balki barcha gap-so‘z. Savollarga nuqta qo‘yish vaqti kelgandir. Xulosa sizdan! To‘g‘ri, erkak kishi “yurishi”. Ikkinchi oila qurishi mumkin. Ammo oilasini eplab qo‘yishi, unga bildirmasligi kerak. Homilador ayoli bolasining hayotidan qayg‘urib, kasalxonada yotganida hech bo‘lmasa suyanchiq bo‘lishi kerak. Bir xil niqobostidagi qizlarga farqi yo‘q ekan, oilalimi ayoli homiladormi?! Hayosiz videolarni oxirigacha qo‘ymadim. Sababi navbatdagi “malika”miz vujudimdagi farzandimni o‘ylamasa ham, men uning sha’ni uchun shunday yo‘l tutdim, — degan edi aktrisa Aziza Yoqubova.

Oradan bir oy vaqt o‘tib, aktrisaning ikkinchi farzandi muddatidan avval dunyoga keldi. Aktrisa o‘g‘li Muhammadamirni tug‘ruqxonadan turmush o‘rtog‘i bilan birga olib chiqdi.

Aziza Yoqubova eri bilan yarashib olganini ma’lum qilgach, folloverlari uni ajrim bilan piar qilganlikda va g‘urursizlikda aybladi. Aktrisa ularga javoban qilgan ishidan afsuslanmasligini ma’lum qildi.

Luiza Rasulova Rixsitilla Abdullayevdan xafa bo‘ldi.

Luiza Rasulova “Aldama meni” ko‘rsatuvida bir vaqtlar taniqli aktyor Rixsitilla Abdullayev bilan o‘rtalarida yuz bergan tushunmovchilik haqida so‘zlab berdi.

“Rixsitilla akaning Instagram profilidan kelgan xabar meni shokka tushirgandi. O‘shanda yig‘lab yuborganman. Rixsitilla aka meni aktrisalar nomiga dog‘ tushirayotganlikda ayblagan”, — degan edi Luiza.

Ushbu qisqa video Telegram’da keng tarqalganidan so‘ng Rixsitilla Abdullayev Luizani kechki ovqatga taklif qildi, unga gul sovg‘a qilib, kechirim ham so‘radi.

Yulduz Usmonova va shoir o‘rtasidagi kelishmovchilik

O‘zbekiston xalq artisti Yulduz Usmonovaning “Xasta bo‘lma” xit qo‘shig‘ining matn muallifi Yo‘lchi Ro‘ziyev she’ri uchun bir necha yillardan buyon gonorar ololmayotganini aytib, xonandani sudga berdi.

Yulduz Usmonova esa Yo‘lchi Ro‘ziyevdan bu ishi uchun xafa bo‘ldi, uni “Shoir Axlatiy” deb atadi hamda “Xasta bo‘lma” qo‘shig‘ini YouTube’dagi rasmiy kanallaridan o‘chirib tashladi.

Ma’lumot uchun, fuqarolik ishlari bo‘yicha Mirzo Ulug‘bek tumanlararo sudida 2021-yilning 29-oktabr kuni qabul qilingan hal qiluv qarori bilan da’vo ariza qisman qanoatlantirilib, Yulduz Usmonovadan da’vogar Yo‘lchi Ro‘ziyevga 50 million so‘m ma’naviy zarar uchun kompensatsiya, bazaviy hisoblash miqdorining 500 barobar miqdorida (135 million so‘m) yetkazilgan zarar hisobiga tovon puli undirish belgilangan.