O‘zbekiston Qurolli kuchlari oliy bosh qo‘mondoni Shavkat Mirziyoyev 24-fevral kuni Qarshi shahridagi Oliy harbiy aviatsiya bilim yurti faoliyati bilan tanishdi.
Bu ta’lim muassasasi 1994-yilda Jizzaxda tashkil etilgan. Lekin u yerda bo‘lajak uchuvchilar amaliyot o‘tashi uchun sharoit yetarli emasdi. Davlat rahbari 2018-yilda Qarshi tumanidagi Xonobod harbiy ayerodromida bo‘lganida harbiy uchuvchilar tayyorlashda ushbu ayerodrom imkoniyatlaridan samarali foydalanish bo‘yicha takliflar bildirgandi. Shu asosida, oliy harbiy aviasiya bilim yurti 2019-yilda Qarshi shahriga ko‘chirildi. O‘quv va mashg‘ulot binolari zamonaviy trenajyorlar, uskunalar, axborot texnologiyalari bilan jihozlandi.
Bu kursantlarga Xonobod aerodromida harbiy havo kemalarini boshqarish va ularga texnik xizmat ko‘rsatish bo‘yicha mashg‘ulotlar olib borish, bevosita o‘quv poligonlarida ishtirok etish imkonini bermoqda. Parvozga tayyorgarlik markazi va axborot-resurs markazi, 4 ta mutaxassislik yo‘nalishlari bo‘yicha o‘quv laboratoriyalari harbiy uchuvchilarning professionallik darajasini oshirishga xizmat qilmoqda. 120 o‘rinli madaniyat markazi, 400 o‘rinli yotoqxona, oshxona, saf maydoni va sport shaharchasi kursantlar ixtiyorida. Ayni paytda bu yerda 276 nafar kursant ta’lim olmoqda.
”Daryo“ muxbiri mazkur aviatsiya bilim yurtidan fotoreportaj tayyorladi.
Izoh (0)