“Аномал совуқда шамоллаб қолган экан”. Фарғона ҳайвонот боғидаги жирафанинг ўлимига очлик сабаб бўлгани рад этилди 

Ижтимоий тармоқларда Фарғона ҳайвонот боғидаги жирафа аномал совуқ сабаб нобуд бўлгани ҳақида хабарлар тарқалди. “Дарё” мухбири мазкур ҳолатга ойдинлик киритиш мақсадида ҳайвонот боғи раҳбари Турсунали Мамажонов билан суҳбатлашди. 

Мамажоновнинг айтишича, Максим лақабли жирафа Фарғонага 2018 йил Қозоғистоннинг Олмаота шаҳридаги ҳайвонот боғидан олиб келинган. Жирафа ҳайвонот боғида 4 йил яшаган. 

У Ўзбекистонда кузатилган аномал совуқ кунларида шамоллаб қолган ва шунинг оқибатида жорий йилнинг 20 январь куни нобуд бўлган. 

“Бу жирафани 2018 йилда Олмаотадаги ҳайвонот боғидан олиб келганман. Ўшанда у кичкина, бўйи икки ярим метр атрофида эди. Бизнинг ҳайвонот боғимизда 4 йил яшади, шу вақт давомида бўйи 5 метрга етганди. Жирафа Африка ҳайвони, иссиқ иқлимга мослашган. Ўтган йилларда қиш мўтадил келди, қаттиқ совуқ бўлмади. Шунинг учун яхши юрганди. Бу йилги аномал совуқ пайтида шамоллаб қолган экан. Ўзи хонаси иссиқ, бироқ кичикроқ, 5 метрга 6 метр ўлчамда эди. Айланиб юришига хона торлик қилгани учун бир жойда кўп туриб қолса оёғи чарчаб ётиб оларди. Шунинг учун тез-тез ташқарига шамоллатишга олиб чиқиб турардик.

Жирафанинг ёзги жойи кенг. Совуқ кунлари ташқарига олиб чиққанимизда шамоллаб қолган экан, шу сабаб нобуд бўлибди. Буни ўзимиз ҳам кейин, мутахассислар келиб, жасадини текширганда билдик. Ветеринария ва чорвачиликни ривожлантириш бошқармасидан мутахассислар келиб жасадини сўйиб текширишди. Ҳеч қандай юқумли касаллик ёки заҳарланиш аломатлари аниқланмади. Бу ҳақда мутахассислар хулосаси бор. Унинг ўлимига очлик сабаб бўлмаган. Озиқ-овқат таъминоти яхши эди.

Ҳайвонот боғида аномал совуқ таъсирида бошқа бирорта қуш ёки жонзот нобуд бўлгани йўқ. Ҳамма ҳайвонлар иссиқ жойда сақланади. Янги жирафа олиб келиш ниятимиз бор. Бундан аввал унга каттароқ – 25 метр атрофида хона тайёрлашимиз керак. Ўзи умуман ҳайвонот боғини кенгайтириш ва ҳайвонлар сонини кўпайтиришни режалаштирганмиз. Президентимизнинг Фарғона вилоятига ташрифи давомида ҳам бу масала кўтарилган, ҳайвонот боғини реконструкция қилишга ва уни янги жонзотлар билан бойитишга 15 миллиард сўм маблағ ажратилиши белгиланган”, — деди Турсунали Мамажонов.

Маълумот учун, Фарғона ҳайвонот боғи 2016 йилнинг 30 декабрь куни вилоят марказида фаолият бошлаган. Умумий майдони қарийб 4 гектарни ташкил этувчи ҳайвонот боғида ҳозирда 140 тур – 500 дан ортиқ ҳайвон сақланади. 64 нафар ходим меҳнат қилади.