Qoraqalpog‘istonning To‘rtko‘l tumanida kanalda suv bosimi ortishi oqibatida uylarni suv bosdi.
Maʼlum bo‘lishicha, 24-fevral kuni soat 02:00 larda To‘rtko‘l tumani “Kalta minor” OFY 6-bo‘limida kanal suvining bosimi ko‘payishi sabab yer o‘pirilishi yuz bergan. Oqibatda 7-8 ta xonadon va uy hayvonlari jabr ko‘rgan. Uy egalari hozirda turar joysiz qolgan.
Ijtimoiy tarmoqda tarqalgan suratlarda voqea oqibatida uylar devorlariga yoriqlar tushib, baʼzi qismlari qulab tushganini, uy hayvonlari halok bo‘lganini ko‘rish mumkin.
“Daryo” muxbiri vaziyatga oydinlik kiritish uchun rasmiylar bilan bog‘landi. Respublika Favqulodda vaziyatlar boshqarmasi mulozimi holat to‘liq o‘rganilgach, rasmiy axborot berilishini maʼlum qildi.
“Daryo” muxbiri bilan suhbatda bo‘lgan yana bir manba esa voqea oqibatida hech kimga zarar yetmaganini, Jo‘qorg‘i Kenges raisi shaxsan o‘zi holat yuz bergan joyga borib, vaziyatni nazorat qilayotganini, fuqarolar murojaatlari ko‘rib chiqilayotganini maʼlum qildi. Manbaning qo‘shimcha qilishicha, voqea tungi soat 02:00 emas, 03:30 larda yuz bergan.
Izoh (1)
Умуман булмаган нарса, хеч качон хитой кимгатур ёрдам бермайди, одамлар бу ишларни тушунмайди хам