MIBning ikkita viloyat boshqarmasiga rahbarlar tayinlandi

Majburiy ijro byurosining Jizzax va Samarqand viloyat boshqarmasiga yangi rahbar tayinlandi. Bu haqda byuro axborot xizmati xabar berdi. 

Xabarga ko‘ra, bosh prokuror buyrug‘i bilan Bekzod Shoimovich Mengliyev Bosh prokuratura huzuridagi Majburiy ijro byurosining Jizzax viloyat boshqarmasi boshlig‘i lavozimiga tayinlandi. Bungacha ushbu lavozimda Sur’at Jabbarov faoliyat yuritgandi. U 1985-yil Surxondaryo viloyatida tug‘ilgan. Ish faoliyatini 2009-yilda Sud ijrochilari Toshkent tuman bo‘limi sud ijrochisi vazifasidan boshlagan. 2015-yilda Sud departamenti Farg‘ona viloyati hududiy boshqarmasi boshlig‘i o‘rinbosari lavozimida ishlagan.

So‘ngra, 2017-yilda Bosh prokuratura huzuridagi Majburiy ijro byurosining bo‘lim bosh inspektori lavozimida o‘z ishini davom ettirgan. Mazkur tayinlovga qadar, Bekzod Mengliyev byuroning Toshkent viloyat boshqarmasi boshlig‘i o‘rinbosari lavozimida faoliyat yuritib kelayotgan edi.

Shuningdek, byuroning Samarqand viloyat boshqarmasiga ham yangi rahbar tayinlandi. Bosh prokuror buyrug‘i bilan Sur’at Shuxratovich Jabbarov Bosh prokuratura huzuridagi Majburiy ijro byurosining Samarqand viloyat boshqarmasi boshlig‘i lavozimiga tayinlandi. Bungacha ushbu lavozimda Mexroj Nasrullayev faoliyat yuritgandi.

Sur’at Jabbarov 1976-yil Jizzax viloyatida tug‘ilgan. U ish faoliyatini 2002-yilda Samarqand viloyati Siyob tuman prokuraturasi ish o‘rganuvchisi vazifasidan boshlagan. So‘ngra, Samarqand viloyati, Toshkent shahar va Jizzax viloyati prokuratura organlarida turli lavozimlarda ish olib borgan.

2017-yilda Bosh prokuratura huzuridagi Majburiy ijro byurosining Jizzax viloyat boshqarmasi boshlig‘i o‘rinbosari lavozimida o‘z ishini davom ettirgan. Mazkur tayinlovga qadar, u byuroning Jizzax viloyat boshqarmasi boshlig‘i lavozimida faoliyat yuritib kelayotgan edi.