“Davlat tomonidan ajratilgan bino bizga qo‘l keldi” — O‘zbekistondagi ilk bolalar xospisi faoliyatiga nazar (foto)

Rivojlangan davlatlarda xospis tushunchasi odamlar uchun begona emas. Ular bunday maskanlar nima uchun tashkil etilishini juda yaxshi biladi. 
2022-yilda O‘zbekistonda ham onkologik kasal bemorlar uchun ilk bolalar xospisi tashkil etilgan. Tashkil etilganiga ko‘p bo‘lmagan bo‘lsa-da, bu maskan bemor bolalarning eng sevimli maskaniga aylanib ulgurgan. 

— To‘rt yildan buyon onkologik kasallikka chalingan bolalar va ularning oilalari uchun yordam ko‘rsatib kelyapmiz. Onkologik kasallikka chalingan bemorlar to‘rtinchi darajadan keyin yashab qolish imkoniyati cheklanadi. Bolada onkologik xastalikning aniqlanishi, ota-ona uchun juda og‘ir. Nafaqat bemor balki uning oilasi ham ruhiy tushkunlikka tushib qoladi. Ularga nafaqat tibbiy, balki ruhiy madad berish ham muhim ahamiyatga ega. Ming afsuski, bolada kasallik aniqlangach, ota-onaning ajrashib ketishi va ko‘p hollarda bunga onani aybdor qilinishi tez-tez uchrab turadi. 
Xospis — kasalxona emas, u mehr maskani. Dori-darmon, kimyo-terapiya va nurdan charchagan bolajonlar mehr bilan parvarishlanadi, — deydi “Ezgu amal” fondi boshqaruv raisi Munira Xo‘jaxonova.

Davlatimiz tomonidan ajratilgan “Zangiota – 2” tibbiyot majmuasida bino xospisning yaratilishiga turtki bo‘lgani va hududning sokinligi bemor bolajonlarga yana da tinchlantirishi haqida so‘zlab berdi. 

— Xospis tashkil etish g‘oyasi paydo bo‘lganidan keyin Sog‘liqni saqlash vazirligiga murojaat qildik. Prezidentimiz qorori bilan “Zangiota-2” tibbiyot majmuasida alohida bino ajratib berildi. 
Davlat tomonidan berilgan binoni bola ruhiyatiga moslab jihozlash, kerakli shart-sharoitlarni yaratishda ularning ko‘magi juda katta bo‘ldi. Bu binoning berilgani bizga qo‘l keldi.
Bu bolajonlar uzoq muddat kasalxonalarda davolanib, charchagan. Xospis kasalxonaga emas, uyga o‘xshashi, uning yonida oila aʼzolari ham yashashiga sharoit yaratishimiz kerak edi, — deydi fond boshqaruv raisi Munira Xo‘jaxonova.