“Давлат томонидан ажратилган бино бизга қўл келди” — Ўзбекистондаги илк болалар хосписи фаолиятига назар (фото)

Ривожланган давлатларда хоспис тушунчаси одамлар учун бегона эмас. Улар бундай масканлар нима учун ташкил этилишини жуда яхши билади. 
2022 йилда Ўзбекистонда ҳам онкологик касал беморлар учун илк болалар хосписи ташкил этилган. Ташкил этилганига кўп бўлмаган бўлса-да, бу маскан бемор болаларнинг энг севимли масканига айланиб улгурган. 

— Тўрт йилдан буён онкологик касалликка чалинган болалар ва уларнинг оилалари учун ёрдам кўрсатиб келяпмиз. Онкологик касалликка чалинган беморлар тўртинчи даражадан кейин яшаб қолиш имконияти чекланади. Болада онкологик хасталикнинг аниқланиши, ота-она учун жуда оғир. Нафақат бемор балки унинг оиласи ҳам руҳий тушкунликка тушиб қолади. Уларга нафақат тиббий, балки руҳий мадад бериш ҳам муҳим аҳамиятга эга. Минг афсуски, болада касаллик аниқлангач, ота-онанинг ажрашиб кетиши ва кўп ҳолларда бунга онани айбдор қилиниши тез-тез учраб туради. 
Хоспис — касалхона эмас, у меҳр маскани. Дори-дармон, кимё-терапия ва нурдан чарчаган болажонлар меҳр билан парваришланади, — дейди “Эзгу амал” фонди бошқарув раиси Мунира Хўжахонова.

Давлатимиз томонидан ажратилган “Зангиота – 2” тиббиёт мажмуасида бино хосписнинг яратилишига туртки бўлгани ва ҳудуднинг сокинлиги бемор болажонларга яна да тинчлантириши ҳақида сўзлаб берди. 

— Хоспис ташкил этиш ғояси пайдо бўлганидан кейин Соғлиқни сақлаш вазирлигига мурожаат қилдик. Президентимиз қорори билан “Зангиота-2” тиббиёт мажмуасида алоҳида бино ажратиб берилди. 
Давлат томонидан берилган бинони бола руҳиятига мослаб жиҳозлаш, керакли шарт-шароитларни яратишда уларнинг кўмаги жуда катта бўлди. Бу бинонинг берилгани бизга қўл келди.
Бу болажонлар узоқ муддат касалхоналарда даволаниб, чарчаган. Хоспис касалхонага эмас, уйга ўхшаши, унинг ёнида оила аъзолари ҳам яшашига шароит яратишимиз керак эди, — дейди фонд бошқарув раиси Мунира Хўжахонова.