Eron uranni boyitish darajasini 84 foizga yetkazgani haqida e’lon qilingan bayonotlarni rad etdi. Bu haqda Al Jazeera xabar berdi.
Eron Atom energiyasi tashkiloti matbuot kotibi Bahroz Kamolvandi bu da’volarni “faktlarni soxtalashtirish” deb atadi. U hozirgacha Islom respublikasi 60 foizlik boyitish chegarasidan o‘ta olmaganini aytdi. Kamolvandi Atom energiyasi xalqaro agentligini (MAGATE) Tehronga “siyosiy bosim vositasi” ekanini aytdi.
“Mavjud vaziyat ushbu muassasaning obro‘siga salbiy ta’sir qiladi”, — dedi u.
Bloomberg agentligi avvalroq Eron yadroviy inshootlarini tekshirgan xalqaro inspektorlar o‘tgan haftada 84 foiz boyitilgan uranni aniqlagani haqida xabar bergandi. MAGATE direktori Rafael Mariano Grossi bu borada tashkilot direktorlar kengashini xabardor qilishini aytgandi.
Yadroviy kelishuv 2015-yilda Eron va BMT Xavfsizlik kengashining doimiy a’zolari (AQSH, Rossiya, Xitoy, Buyuk Britaniya va Fransiya), shuningdek, Germaniya o‘rtasida imzolangan. Kelishuvlar Tehronga uranni 3,67 foizgacha boyitish va maksimal 300 kg uran ishlab chiqarish imkonini beradi. AQSH bir tomonlama ravishda yadroviy bitimdan chiqqanidan so‘ng, Eron yadroviy kelishuv bo‘yicha o‘z majburiyatlarini to‘xtatdi.
Izoh (0)