Eron uranni boyitish tezligini mamlakat yadro sanoati tarixidagi eng yuqori ko‘rsatkichga yetkazdi. Bu haqda Al-Arabia xabar berdi.
Eron Atom energiyasi tashkiloti (AEOI) rahbari Muhammad Islomiy bu bo‘yicha ma’lumot bergan.
“Bugungi kunda Eronning uranni boyitish salohiyati mamlakat yadro sanoati tarixidagi eng yuqori darajaga yetdi, bu avvalgi darajalardan ikki barobarga oshgan”, — deydi Islomiy.
Xalqaro atom energiyasi agentligining (MAGATE) so‘nggi ma’lumotiga ko‘ra, Eron rasmiylari Fordoda kam boyitilgan uran ishlab chiqarishni sezilarli darajada kengaytirishni rejalashtirmoqda. Ular yana 14 ta ilg‘or IR-6 sentrifugalarini (uranni tozalash yoki undan yuqori darajada bomba yonilg‘isi qilish uchun ishlatiladi) o‘rnatmoqchi. Bundan tashqari, Eron Natanzda yoqilg‘ini boyitish bo‘yicha faoliyatni rivojlantirmoqchi va 100 dan ortiq sentrifuga kaskadlarini sig‘dira oladigan ikkinchi ishlab chiqarish binosini o‘rnatmoqchi.
Eron allaqachon atom zavodida uranni 60 foizgacha boyitmoqda. 2015-yilgi xalqaro yadroviy kelishuv shartlariga ko‘ra, Eron uranni 3,67 foizdan ortiq boyitish huquqiga ega emas. Yadro qurolini ishlab chiqarish uchun uranni 90 foizgacha boyitish zarur.
Eron bilan yadroviy kelishuvning izdan chiqishi
Xalqaro yadroviy bitim bir necha yil oldin AQSH (o‘sha paytda prezident Donald Tramp bo‘lgan) undan bir tomonlama chiqib ketganidan keyin o‘z faoliyatini to‘xtatdi. O‘shandan beri ushbu kelishuvni saqlab qolish uchun urinishlar bo‘lgan, ammo ular hech biri natija bermadi.
Yaqinda Eronda e’lon qilinmagan uchta joyda uran izlari topildi. Shu munosabat bilan, MAGATE Boshqaruvchilar kengashi 17-noyabr kuni AQSH va “yevrouchlik”ning Yadro qurolini tarqatmaslik to‘g‘risidagi kelishuv bo‘yicha majburiyatlarni bajarishga chaqiruvchi rezolyutsiyasini qabul qildi.
Bundan tashqari, MAGATE Erondan e’lon qilinmagan obyektlarda topilgan yadroviy materiallarning kelib chiqishini zudlik bilan tushuntirishni, hujjatlarni taqdim etishni va ularga kirishni talab qildi. Tehronning Fordodagi zavodda uranni 60 foizgacha boyitish qarori ushbu rezolyutsiyaga javoban qabul qilingani aytilmoqda.
Mavzuga doir:
Izoh (0)