Xitoy AQSHning Rossiyaga qurol yetkazib bermaslik chaqirig‘iga keskin javob qaytardi

Xitoy Tashqi ishlar vazirligi AQSH Rossiyaga qurol sotish bo‘yicha “ma’ruza o‘qishga haqqi yo‘q”ligini ma’lum qildi. Bu haqda CNN xabar berdi.

AQSH rasmiylari Xitoy Rossiya armiyasiga “o‘limga olib keluvchi yordam” ko‘rsatish haqida xavotir bildirgandi. Xitoy Tashqi ishlar vazirligi matbuot kotibi Van Venbin “jang maydonini doimiy ravishda qurol-yarog‘ bilan ta’minlayotgan Xitoy emas, AQSH” ekanini ta’kidladi.

“Amerika tomonining Xitoyga ma’ruza o‘qishga haqqi yo‘q va biz hech qachon AQSHga Xitoy-Rossiya munosabatlariga diktatsiya qilishiga yoki hatto bosim o‘tkazishiga yo‘l qo‘ymaymiz. Kim dialog va tinchlikka chaqirmoqda, kim pichoq berib, qarama-qarshilikka da’vat qilmoqda?” — dedi diplomat.

Van Venbin Xitoy Ukrainadagi “mojaro”ni hal qilish uchun “tinchlikka chaqirish va muzokaralarni ilgari surish”da davom etishini hamda “vaziyatni pasaytirish va sovutishga yordam berishda konstruktiv rol o‘ynashga” qat’iy qaror qilganini qo‘shimcha qildi.

Avvalroq CNN Xitoy go‘yoki qo‘sh o‘yin o‘ynayotgani haqida xabar bergandi. Omma oldida Pekin tinchlik tarafdori, biroq Xitoy Rossiyaga yashirincha halokatli qurollar yetkazib berishga tayyorlanayotgani haqida “ogohlantiruvchi” signallar mavjudligini ma’lum qilgandi.

Bunga javoban AQSH Davlat kotibi Entoni Blinken Ukrainada ishlatish uchun Rossiyaga halokatli qurollar berilsa, Xitoy jiddiy oqibatlarga olib kelishini aytdi. Uning so‘zlariga ko‘ra, bu javob choralariga tayyor bo‘lgan AQSH bilan munosabatlarga ta’sir qiladi.