Rossiya Xavfsizlik kengashi kotibi o‘rinbosari Dmitriy Medvedev AQSH prezidenti Jo Baydenning Ukrainaga tashrif buyurganiga munosabat bildirdi. Siyosatchi o‘zining Telegram kanalida bu haqda post qoldirdi.
Medvedevning so‘zlariga ko‘ra, AQSH prezidenti xavfsizlik kafolatlarini olgan. Siyosatchi Ukrainaning asosiy muammosi qurol-yarog‘ yetkazib berish va G‘arbning va’dasi emasligi, balki odamlarning xorijga chiqib ketishida ekanini aytdi.
“Turli ekspertlarning hisob-kitoblariga ko‘ra, jami 15 dan 20 milliongacha odam Ukrainadan ketgan”, — deydi Xavfsizlik kengashi raisi o‘rinbosari.
Shuningdek, u hozir Ukrainada 20-25 milliondan ortiq odam yashashi va bu raqam “kamayish tendensiyasida” ekanini qo‘shimcha qildi.
“Demak, albatta, tanklar va snaryadlar muhim. Lekin odamlar bundanda muhimroqdir. Ularning ommaviy ravishda ketishi kelajak kimga tegishli degan savolga javob bo‘ladi”, — deb yozgan Medvedev.
AQSH prezidentining milliy xavfsizlik bo‘yicha maslahatchisi Jeyk Sallivan Baydenning Kiyevga tashrifi haqida Rossiya xabardor qilinganini aytdi.
“Mojaro yuzaga kelmasligi uchun prezident Bayden Kiyevga jo‘nab ketishidan bir necha soat oldin Rossiyani xabardor qilgandik”, — dedi Sallivan.
20-fevral kuni Jo Bayden Kiyevga Vladimir Zelenskiy bilan uchrashish uchun kelgani ma’lum bo‘ldi. Havo hujumidan ogohlantirish tizimi sadolari ostida u Sofiya maydonida halok bo‘lgan himoyachilar xotirasiga hurmat bajo keltirdi. The New York Times nashri Baydenning Kiyevga maxfiy safari qanday tayyorlangani haqida ma’lumot berdi.
Izoh (0)