Eron 3-dekabr kuni mamlakat janubi-g‘arbida yangi atom elektr stansiyasini (AES) qurishni boshladi. Bu haqda Al-Arabia xabar berdi.
Ma’lum qilinishicha, Karoon nomi bilan mashhur bo‘lgan 300 megavatt quvvatga ega yangi elektr stansiyasini qurish yetti yil davom etadi va uning narxi taxminan 2 milliard dollarga baholanmoqda. AES Eronning neftga boy Xuziston viloyatida, Iroq bilan g‘arbiy chegarasiga yaqin joyda joylashadi.
Stansiya dastlab fransuz kompaniysi tomonidan qurilishi rejalashtirilgan, biroq kompaniya 1979-yilgi Islom inqilobidan keyin o‘z “majburiyatidan” qaytgan.
Eron janubidagi Busher portida 2011-yilda Rossiya yordami bilan ishga tushirilgan bitta atom elektr stansiyasi hamda bir qancha yerosti yadro inshootlariga ega. 2019-yilda Eron va Rossiya Busherda ikkinchi reaktor qurilishining yangi bosqichini boshlagan. Karoon qurilishi haqidagi e’lon AQSH va Eron o‘rtasida 2015-yilgi yadroviy kelishuvga qaytish bo‘yicha bilvosita muzokaralar boshi berk ko‘chaga kirib qolgan paytga to‘g‘ri keldi.
Eslatib o‘tamiz, avvalroq AQSH prezidenti Eron yadro dasturini harbiy yo‘l bilan to‘xtatishga tayyorligini bildirgandi. 22-noyabr kuni Eronning ISNA agentligi Tehron Fordodagi yerosti yadro obyektida uranni 60 foizgacha boyitishga kirishganini ma’lum qildi. Yadro qurolini ishlab chiqarish uchun uranni 90 foizgacha boyitish zarur. Fransiya, Buyuk Britaniya va Germaniya Eronni yadroviy bitimni buzishda aybladi.
Mavzuga doir: Eron yangi yadro reaktori qurishni boshladi
Izoh (0)