84 фоиз эмас: Эрон ҳозиргача уранни қанчага бойитганини маълум қилди

Эрон уранни бойитиш даражасини 84 фоизга етказгани ҳақида эълон қилинган баёнотларни рад этди. Бу ҳақда Al Jazeera хабар берди.

Эрон Атом энергияси ташкилоти матбуот котиби Баҳроз Камолванди бу даъволарни “фактларни сохталаштириш” деб атади. У ҳозиргача Ислом республикаси 60 фоизлик бойитиш чегарасидан ўта олмаганини айтди. Камолванди Атом энергияси халқаро агентлигини (МАГАТЭ) Теҳронга “сиёсий босим воситаси” эканини айтди.

“Мавжуд вазият ушбу муассасанинг обрўсига салбий таъсир қилади”, — деди у.

Bloomberg агентлиги аввалроқ Эрон ядровий иншоотларини текширган халқаро инспекторлар ўтган ҳафтада 84 фоиз бойитилган уранни аниқлагани ҳақида хабар берганди. МАГАТЭ директори Рафаэл Мариано Гросси бу борада ташкилот директорлар кенгашини хабардор қилишини айтганди.

Ядровий келишув 2015 йилда Эрон ва БМТ Хавфсизлик кенгашининг доимий аъзолари (АҚШ, Россия, Хитой, Буюк Британия ва Франция), шунингдек, Германия ўртасида имзоланган. Келишувлар Теҳронга уранни 3,67 фоизгача бойитиш ва максимал 300 кг уран ишлаб чиқариш имконини беради. АҚШ бир томонлама равишда ядровий битимдан чиққанидан сўнг, Эрон ядровий келишув бўйича ўз мажбуриятларини тўхтатди.