Britaniyaning Xalqaro strategik tadqiqotlar instituti (IISS) hisobotiga ko‘ra, Rossiya Ukrainadagi bir yillik urushda zamonaviy tanklarining yarmidan ayrildi. Bu haqda hisobot bilan tanishgan Der Spigel nashri xabar berdi.
Hisobotga ko‘ra, urush boshidan beri Rossiya urushdan oldingi T-72B va T-72B3M tanklarining 50 foizga yaqinini, shuningdek, ko‘p sonli T-80 tanklarini yo‘qotgan. Ushbu tanklar Rossiya arsenalidagi eng zamonaviylaridan biri. Katta yo‘qotishlar tufayli rus armiyasi omborlardan xizmatga qaytarilayotgan eski jihozlardan foydalanishga majbur bo‘lgan.
Bundan tashqari, hisobotda Rossiya aviatsiyasining yo‘qotishlari haqida ham xabar berilgan, ekspertlar buni urushdan oldingi darajaga qaraganda 6-8 foizga ko‘p deb, baholagan. Ba’zi samolyot modellari orasida, masalan, Su-24M bombardimonchi va Su-30SM qiruvchi samolyotlarida esa yo‘qotishlar 10-15 foizni tashkil qiladi.
Urush boshidanoq Rossiya harbiy texnikada jiddiy yo‘qotishlarga uchradi. Aprel oyida yuzlab tanklar va minglab zirhli texnikalar yo‘q qilingani haqida xabar berilgandi. Urushning dastlabki bosqichlarida ruslarning yo‘qotishlari zamonaviy tankka qarshi tizimlar bilan qurollangan Ukraina harbiylarining harakatlari samaradorligi, Rossiyaning esa urushga umuman tayyor emasligi bilan bog‘liq bo‘lgan.
Oryx harbiy-tahlil loyihasiga ko‘ra, urush paytida jami hisobda Rossiya 1 700 dan ortiq tankni yo‘qotdi. Ulardan 1 020 tasi yo‘q qilingan, yana 550 ga yaqini Ukraina harbiylari tomonidan o‘lja qilib olingan. Qolgan tanklar aftidan, tashlab yuborilgan yoki shikastlangan, chunki loyihada ularning kelajakdagi taqdiri haqida hech qanday fotosurat yoki video dalil keltirilmagan.
Izoh (0)