Turkiyadagi zilzila paytida binolarning katta qismi qulashiga tuproqdagi muammolar sabab bo‘lgan. Bu haqda Turkiyaning Atrof-muhit, urbanizatsiya va iqlim o‘zgarishi vaziri Murat Kurumga tayanib, Yeni Safak xabar berdi.
Ma’lum qilinishicha, hozirgacha zilziladan jabr ko‘rgan 10 viloyatda 47 mingta binodagi 211 mingta uy vayron bo‘lgan yoki zarar ko‘rgan. Aholi uchun 300 mingta uy-joy qurish kerakligi aytilmoqda.
“Binolarning aksariyati yerosti qatlami, kuchli zilzila natijasida tuproqning suyuqlanishi va muhandislik xizmati yo‘qligi sababli vayron bo‘lgan. Biz yerni o‘rganishda ham, qurilish uchun yangi joylarni aniqlashda ham shahar ehtiyojlarini inobatga olgan holda o‘z ishimizni davom ettirmoqdamiz”, — dedi vazir.
Rasmiyning ta’kidlashicha, qulagan uylar 1999-yildan oldin, Turkiyada halokatli zilzila sodir bo‘lganidan oldin qurilgan. O‘sha fojiadan so‘ng mamlakatda zilzila ehtimoli bor hududlarda qurilish qoidalari kuchaytirilgan. Kurum ma’lumotiga ko‘ra, jiddiy zarar ko‘rgan binolar buziladi.
“Aftershoklar (zilziladan keyin sodir bo‘ladigan seysmik tebranishlar) hali ham davom etmoqda. Gaziantepdagi zararni baholashning katta qismini uch kun ichida, Turkiyadagi zararni aniqlashni esa bir hafta ichida yakunlashni rejalashtirmoqdamiz”, — deya xulosa qildi vazir.
18 mingdan ortiq odamning hayotiga zomin bo‘lgan 1999-yildagi halokatli zilzilalardan so‘ng Turkiya turar-joy binolari qurilishini tartibga soluvchi qoidalarni qayta ko‘rib chiqdi. Xususan, 2007-yilda zilziladan himoya qilish uchun zarur bo‘lgan talablarni hisobga olgan holda uy-joy qurish kodeksi qabul qilindi.
Avvalroq Turkiya prezidenti Rajab Toyib Erdo‘g‘on fojiadan keyin vayron bo‘lgan binolarning 98 foizi 1999-yilgacha qurilganini aytdi. Prezident zilziladan jabr ko‘rgan o‘nta viloyatda kamida 41 ming uy vayron bo‘lgan yoki yaroqsiz holatdaligi, ularni zudlik bilan buzish kerakligini ta’kidladi.
6-fevral kuni Turkiya janubi-sharqidagi Qahramonmarash viloyatida 7,8 va 7,6 magnitudali zilzilalar to‘qqiz soatlik interval bilan sodir bo‘ldi. Zilzila kuchi qo‘shni davlatlar, jumladan Suriyada ham sezildi. Oxirgi ma’lumotlarga ko‘ra, har ikki mamlakatda qurbonlarning umumiy soni 41 ming kishidan oshgan.
Izoh (0)