“Daryo” nashri 15-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Turkiya va Suriyada qurbonlar soni 40 mingdan oshdi. Zilziladan so’ng 5 mln dan ortiq odam boshpanasiz qolishi aytilmoqda
Turkiya va Suriyada sodir bo‘lgan zilzilalar oqibatida halok bo‘lganlar soni 40 mingdan oshdi. Bu haqda Al Jazeera xabar berdi.
Turkiya hukumati hozirgacha, vayronalar ostidan 35 418 kishining jasadi topilganini, Suriya rasmiylari esa 5 800 dan ortiq odam o‘lganini ma’lum qilgan. mazkur holatda Turkiya prezidenti Rajab Toyyib Erdo‘g‘on mamlakatda vayronalar ostidan 8 mingdan ortiq odam tirik olib chiqilganini ta’kidlagan.
Ayni vaziyatda Xalqaro migratsiya tashkilotining gumanitar yordam yuklangan o‘nta yuk mashinasi Bab el-Salom nazorat-o‘tkazish punkti orqali Suriyaga jo‘natilgan. Turkiyadagi zilziladan 200 soat o‘tgach qutqaruvchilar vayronalar ostidan tirik odamlarni ham aniqlamoqda.
BMT hisob-kitoblariga ko‘ra, zilzilalardan so‘ng Suriyada 5,3 millionga yaqin odam boshpanasiz qolishi mumkin. Ayni paytda Turkiya va Suriyada 900 mingga yaqin odam zudlik bilan issiq ovqatga muhtoj.
Rossiya samolyotlari Ukraina chegaralariga yaqinlashadi, Ukraina havo hujumidan mudofaani to‘liq saqlay oladimi?
Rossiya harbiy samolyotlar va vertolyotlarni Ukraina chegaralariga yaqinroq joyga ko‘chirmoqda, bu esa urushning yangi bosqichga o‘tishidan dalolat berishi mumkin. Bu haqda Financial Times gazetasi NATO mamlakatlarining razvedka ma’lumotlariga ega bo‘lgan ikki rasmiysiga tayanib xabar berdi.
Nashr suhbatdoshlaridan birining so‘zlariga ko‘ra, Rossiyaning quruqlikdagi qo‘shinlari kamaygan, shuning uchun Kreml yangi hujumning bir qismi sifatida qolgan samolyotlariga tayanishi mumkin. NATO hisoblashicha, Rossiya harbiy aviatsiyasining qariyb 80 foizidan foydalangan holda havo kampaniyasini boshlashga tayyorlanyapti va Ukrainaning havo hujumidan mudofaa tizimini ishdan chiqarishga urinmoqda.
Financial Times manbalarining aytishicha, shu sababli Ukraina havo mudofaasini kuchaytirish masalasi G‘arb ittifoqchilarining so‘nggi uchrashuvida ustuvor masala bo‘lgan, Ukrainaga qiruvchi samolyotlar yetkazib berish masalasi esa ikkinchi o‘ringa qo‘yilgan.
Urush uchun to’planayotgan odamlar...
Pentagon rahbari Lloyd Ostin 14-fevral kuni Bryusselda bo‘lib o‘tgan NATO yig‘ilishidan so‘ng jurnalistlarga Rossiya aviatsiyasining Ukraina chegaralari yaqinida to‘planishi belgilarini hali ko‘rmaganini aytdi.
“Ammo bilamizki, Rossiya zaxirasida hali ham katta miqdordagi aviatsiya bor. Shuning uchun Ukrainani imkon qadar ko‘proq havo hujumidan mudofaa bilan ta’minlash uchun hamma narsani qilish kerakligini ta’kidlamoqdamiz”, — deya uning so‘zlarini keltiradi BBC.
Ukraina va G‘arb razvedkasi Rossiya Ukrainaga yangi hujumni rejalashtirayotgani haqida bir necha bor ogohlantirgan, hujum bosqinning bir yilligiga to‘g‘ri kelishi mumkin.
The Washington Post gazetasining G‘arb davlatlari va Ukraina razvedka xizmati hisob-kitoblariga tayanib xabar berishicha, hozirda Rossiya Ukrainada 300 mingga yaqin odam to‘plagan, bu urush boshidagi odamlari sonidan ikki baravar ko‘p. G‘arb davlatlari Rossiya urushga yana bir necha yuz ming kishini jalb qilishini kutmoqda.
Maktabgacha va maktab taʼlimi vazirligi hududiy bo‘linmalari hokimliklarga o‘tkaziladimi?
Maktabgacha va maktab taʼlimi vazirligi hududiy bo‘linmalari hokimliklarga o‘tkazilishi keltirilgan prezident farmoni loyihasiga eʼtiroz bildirdi. Taʼkidlanishicha, ushbu normativ-hujjat hozirda loyiha bo‘lib, rasmiy kuchga ega emas. Bu haqda vazirlik axborot xizmatida maʼlum qilindi
Xabarga ko‘ra, prezidentining “Respublika ijro etuvchi hokimiyat organlari va mahalliy hokimliklar masʼuliyatini oshirish bo‘yicha qo‘shimcha chora-tadbirlari to‘g‘risida”gi farmoni loyihasida Maktabgacha va maktab taʼlimi vazirligining hududiy bo‘linmalarini mahalliy hokimliklar tuzilmasiga o‘tkazish qayd etilgan va ushbu hujjat loyihasini tegishli vazirlik va davlat idoralar bilan kelishish uchun Adliya vazirligi tomonidan “project.gov.uz”ga joylashtirilgan.
Taʼkidlanishicha, ushbu normativ-hujjat hozirda loyiha bo‘lib, rasmiy kuchga ega emas. Ayni damda Maktabgacha va maktab taʼlimi vazirligi tomonidan farmon loyihasidagi tegishli bandlar bo‘yicha eʼtiroz bildirilib, Adliya vazirligi bilan muzokaralar o‘tkazilgan.
Vazirlik xabarida ushbu masala bo‘yicha soha xodimlari va keng jamoatchilik vakillarining xavotiriga o‘rin yo‘qligi aytilgan.
Izoh (0)