16-fevralga o‘tar kechasi Rossiya Ukrainaga raketa va uchuvchisiz uchoqlar yordamida “aralash hujum” uyushtirdi. Bu haqda Ukrainaning “Janub” Qurolli kuchlari operativ qo‘mondonligi matbuot kotibi Natalya Gumenyuk ma’lum qildi.
Xususan, Gumenyakning so‘zlariga ko‘ra, rus qo‘shinlari sakkizta “Kalibr” raketasini uchirgan. Barcha raketalar — oltitasi Nikolayev viloyati, ikkitasi Xerson viloyati ustida urib tushirilgan.
“Afsuski, shu bilan bir qatorda dushman mag‘lubiyatning boshqa usullarini ham qo‘lladi – bu aralash hujum edi, xususan, dron va strategik samolyotlar yordamida amalga oshirildi. Lvov viloyatida zarbalar ayrim nishonlarga teggan”, — dedi u.
Ukraina prezident ofisining rahbari Andrey Yermak Rossiya qo‘shinlari “taktikasini biroz o‘zgartirganini” aytdi. “Ular soxta nishonlardan foydalangan holda faol razvedka ishlarini olib bormoqda”, — deb yozgan Yermak Telegram’da. Shu bilan birga u Ukraina havo mudofaasi “dushman raketalari va dronlarining aksariyatiga dosh bera olishini” ta’kidlagan.
Lvov viloyati rahbari Maksim Kozitskiyning ma’lum qilishicha, hujum oqibatida viloyatda muhim infratuzilma obyekti zarar ko‘rgan, yong‘in sodir bo‘lgan. Jabrlanganlar va qurbonlar yo‘q, deb yozdi Kozitskiy Telegram’da va tafsilotlarni keyinroq yoritishga va’da berdi.
Yermakning so‘zlariga ko‘ra, hujumdan nafaqat Lvov viloyati, boshqa hududlar ham jabr ko‘rgan. “Ukrainaning shimoli, g‘arbiy qismi, shuningdek, Dneprbo‘yi va Kirovograd viloyatlariga zarbalar berildi”, dedi Ukraina prezidenti ofisining rahbari. U yetkazilgan zarar miqdoriga aniqlik kiritmadi.
Oktabr oyining boshidan beri Rossiya armiyasi Ukraina hududiga muntazam ravishda raketalar va Eronda ishlab chiqarilgan dronlar bilan ommaviy zarbalar berib kelmoqda. Bunday zarbalarning nishoni ko‘pincha energiya infratuzilmasi obyektlari bo‘lib chiqadi. Ukraina energetika tizimida quvvat yetishmasligi sababli bir necha oylardan buyon barcha hududlarda ham rejali, ham favqulodda elektr energiyasini o‘chirish kuzatilmoqda.
Izoh (0)