Европарламент Грузия ҳукуматини 2021 йил кузидан бери ҳибсда сақланаётган собиқ президент Михаил Саакашвилини озод қилишга ва унинг хорижда даволанишига рухсат беришга чақирувчи резолюцияни маъқуллади.
Европарламентнинг пресс-релизида қайд этилишича, депутатлар сиёсатчининг соғлиғи кескин ёмонлашганидан жиддий хавотирда, шунинг учун улар Грузия расмийларини Саакашвилининг саломатлиги ва фаровонлигини таъминлаш, шунингдек, унга муносиб муолажа учун масъул эканини унутмасликларини сўрамоқда.
Бундан ташқари, ҳужжатда мамлакатда маҳбусларга нисбатан қандай муносабатда бўлиниши ҳукуматнинг Европа қадриятларига содиқлиги борасида муҳим кўрсаткич экани алоҳида қай этилган.
Европарламент бошқа бир ҳужжатда Европа Кенгаши ва Европа Иттифоқидаги ҳамкорларини Грузия собиқ бош вазири Бидзина Иванишвилига қарши санкциялар жорий этишга чақирди. Резолюцияда у Саакашвилининг шахсий қасос учун таъқиб қилинишга жавобгар олигарх деб аталган.
Ҳужжатни 577 нафар депутат қўллаб-қувватлади, 33 киши қарши овоз берди.
Европарламент резолюцияси қонуний мажбурлаш кучига эга эмас.
Саакашвили нега қамалганди?
2018 йилнинг январида Тбилиси шаҳар суди Михаил Саакашвилини сиртдан уч йиллик қамоқ жазосига ҳукм қилган эди, суд банк ходими Сандро Гиргвлианининг ўлдирилиши бўйича иш доирасида сиёсатчини мансаб ваколатини суиистеъмол қилиш моддаси бўйича айбдор деб топган. Ўша йилнинг ёзида суд Саакашвилини собиқ парламент депутати Валерий Гелашвилига ҳужум уюштирганликда айблаб, олти йиллик қамоқ жазосига ҳукм қилди.
2021 йил октябрь ойида собиқ президент яширинча Грузияга қайтди, бироқ у тез орада ҳибсга олинди. Қамоқхонада сиёсатчининг аҳволи ёмонлаша бошлади. 2022 йилнинг май ойидан бери Саакашвили Тбилисидаги Vivamed клиникасида. Суд мажлисларида 20 нафар шифокор Саакашвилининг аҳволи оғир эканини айтган. 2023 йил февралида Тбилиси шаҳар суди ҳимоячининг Саакашвилини жазодан озод қилишни ёки ҳукмларнинг ижросини тўхтатиб туришни талаб қилган илтимосномасини қаноатлантиришдан бош тортди.
Аввалроқ Украина Ташқи ишлар вазирлиги Грузия расмийларидан сиёсатчини “таҳқирлашни бас қилишни” ва уни Киевга қайтаришни талаб қилганди, чунки Саакашвили Украина фуқаролигига эга.
Изоҳ (0)