Buxoroning G‘ijduvon tumanda lola gulining maydalangan bo‘laklarini giyohvandlik vositasi deb sotgan fuqaro qo‘lga olindi.
Viloyat IIB matbuot xizmatining ma’lum qilishicha, 1-fevral kuni 1958-yilda tug‘ilgan K.I. 24,68 grammni tashkil qilgan, besh dona qog‘oz o‘ramidagi lola gulining maydalangan holdagi bo‘laklarini ko‘knori giyohvandlik vositasining xashagi deb aldab, G‘ijduvon tumanida yashovchi fuqaroga 100 ming so‘mga sotib, firibgarlik jinoyatini sodir qilgan.
K.I. o‘zining jinoiy harakatlarini takroran davom ettirib, 2-fevral kuni o‘zganing mol-mulkini aldash va ishonchni suiisteʼmol qilish yo‘li bilan qo‘lga kiritish maqsadida, shu tumanda yashovchi yana bir fuqaro ishonchiga kirib, ikki dona qog‘oz o‘ramlariga joylashtirilgan, sof og‘irligi 18,84 gramm bo‘lgan lola gulining maydalangan bo‘laklarini ko‘knori xashagi deb aldab, 200 ming so‘mga sotib, takroran firibgarlik jinoyatini sodir qilgan.
U G‘ijduvon tumani IIB JQB xodimlari tomonidan o‘tkazilgan tezkor tadbirda qo‘lga olingan. Holat yuzasidan Jinoyat kodeksining 168-moddasi (takroran firibgarlik sodir etish) 3-qismi bilan jinoyat ishi qo‘zg‘atilib, hozirda tergov harakatlari olib borilmoqda.
Ushbu moddada ko‘rsatilgan jinoyatni sodir etganlar BHMning 300 baravaridan 400 yuz baravarigacha (90 million so‘mdan 120 million so‘mgacha) miqdorda jarima yoki 2 yildan 3 yilgacha axloq tuzatish ishlari yoxud muayyan huquqdan mahrum etilgan holda besh yildan 8 yilgacha ozodlikdan mahrum qilish bilan jazolanadi.
Izoh (0)