Toshkent shahar Yashnobod tumanidagi ovqatlanish shoxobchalarining birida tegajog‘lik qilgan hamkasbini o‘ldirgan ayolga hukm o‘qildi.
Maʼlum qilinishicha, holat 2022-yilning 4-sentyabr kuni soat taxminan 00:30 da sodir bo‘lgan. 1995-yilda tug‘ilgan sudlanuvchi ayol avvaldan tanish bo‘lgan 1994-yilda tug‘ilgan erkak bilan janjallashib qolgan. Oqibatda ayol jabrlanuvchiga pichoq bilan jarohat yetkazgan, yigit shifoxonaga olib ketilayotgan vaqtda vafot etgan. Jinoyat ishlari bo‘yicha Yashnobod tuman sudida holat yuzasidan sud ishi ko‘rib chiqildi. Sudda u o‘z qilmishiga quyidagicha izoh berdi:
“Turmushga chiqib, ajrashganman, farzandim yo‘q. U bilan birga ishlardik. Ko‘p bor ichib kelib tegajog‘lik qilib yurgan. Men oshxonani tozalayman, deb ertaroq kelgandim. U ham uyidan mast holda kelgan ekan. Kechasi soat 23:00 larda eshikni taqqillatib, tashqariga chaqirdi. Eshikni ochmasligimni aytdim. Ketdi deb o‘ylab tashqariga chiqdim. U birdan xonasidan chiqib qoldi, o‘sha yerda o‘pib tegajog‘lik qila boshladi. Men ichkariga kirib ketdim. Ovqat suzadigan xonamizda pichoqlar turgandi. O‘zimni himoya qilish maqsadida bittasini olgandim, uni o‘ldirish maqsadim bo‘lmagan. Kuch bilan quchoqlab o‘ziga tortganida pichoq kirib ketdi. Pushaymonman, o‘zimni himoya qilish uchun qildim”.
Marhumning otasi o‘g‘lini o‘ldirgani uchun ayolning qamalishini talab qilgan. Sud hukmi bilan ayol Jinoyat kodeksining 104-moddasi 3-qismi d bandida nazarda tutilgan jinoyatni sodir etganlikda aybdor deb topildi va unga 6 yil-u 6 oy muddatga ozodlikdan mahrum qilish jazosi qo‘llanildi.
Izoh (0)