Бухоронинг Ғиждувон туманда лола гулининг майдаланган бўлакларини гиёҳвандлик воситаси деб сотган фуқаро қўлга олинди.
Вилоят ИИБ матбуот хизматининг маълум қилишича, 1 февраль куни 1958 йилда туғилган К.И. 24,68 граммни ташкил қилган, беш дона қоғоз ўрамидаги лола гулининг майдаланган ҳолдаги бўлакларини кўкнори гиёҳвандлик воситасининг хашаги деб алдаб, Ғиждувон туманида яшовчи фуқарога 100 минг сўмга сотиб, фирибгарлик жиноятини содир қилган.
К.И. ўзининг жиноий ҳаракатларини такроран давом эттириб, 2 февраль куни ўзганинг мол-мулкини алдаш ва ишончни суиистеъмол қилиш йўли билан қўлга киритиш мақсадида, шу туманда яшовчи яна бир фуқаро ишончига кириб, икки дона қоғоз ўрамларига жойлаштирилган, соф оғирлиги 18,84 грамм бўлган лола гулининг майдаланган бўлакларини кўкнори хашаги деб алдаб, 200 минг сўмга сотиб, такроран фирибгарлик жиноятини содир қилган.
У Ғиждувон тумани ИИБ ЖҚБ ходимлари томонидан ўтказилган тезкор тадбирда қўлга олинган. Ҳолат юзасидан Жиноят кодексининг 168-моддаси (такроран фирибгарлик содир этиш) 3-қисми билан жиноят иши қўзғатилиб, ҳозирда тергов ҳаракатлари олиб борилмоқда.
Ушбу моддада кўрсатилган жиноятни содир этганлар БҲМнинг 300 бараваридан 400 юз бараваригача (90 миллион сўмдан 120 миллион сўмгача) миқдорда жарима ёки 2 йилдан 3 йилгача ахлоқ тузатиш ишлари ёхуд муайян ҳуқуқдан маҳрум этилган ҳолда беш йилдан 8 йилгача озодликдан маҳрум қилиш билан жазоланади.
Изоҳ (0)