Qirg‘iziston prezidenti Sadir Japarov sobiq prezident Almazbek Atambayevga nisbatan ilgari chiqarilgan hukm bekor qilinib, uning koloniyadan ozod etilishiga munosabat bildirdi.
“Sud va huquq-tartibot idoralari qaror qilishdimi, demak biz unga bo‘ysunishimiz kerak. Qonunlarga amal qilib yashashni o‘rganishimiz kerak. O‘tgan yili sud Atambayevni oktabr voqealari, maktab qurilishi va xorijliklarga pasport berish bo‘yicha jinoiy ishlar bo‘yicha oqlagan edi. O‘shanda ham men sud qaroriga bo‘ysunishimiz kerakligini aytgandim. Bo‘ysunganmiz”, — dedi Japarov.
U hatto dushmaniga ham qamoqda o‘tirishni ravo ko‘rmasligini ta’kidladi.
“
Hatto ilon bolasi qamoqda bo‘lmasligi kerak, degan naql bor. Men dushmanimga ham qamoqda o‘tirishni tilamayman. Parvardigor Payg‘ambarimizga: ‘Men hamisha kechirimli va sabrlilar tarafidaman’, degan. Biz kechirishni bilishimiz kerak. Agar Xudoga ishonsak, ishlarimiz o‘ngidan keladi”, — dedi Japarov “Kabar” davlat agentligiga bergan intervyusida.
Almazbek Atambayev 14-fevral kuni koloniyadan chiqarildi. Qirg‘iziston Oliy sudi Atambayevga nisbatan ilgari chiqarilgan hukmni bekor qildi va jinoiy ishni qayta tergovga yubordi. Sud Atambayevning Qirg‘izistondan tashqarida davolanishiga ham ruxsat bergan.
Ozodlikka chiqqanidan keyingi intervyularidan birida Atambayev O‘zbekiston bilan erishilgan chegara kelishuvlarini qo‘llab-quvvatladi. Uning fikricha, bu tarixiy qaror bo‘lgan.
“Albatta, hozir qo‘shni davlat rahbari Shavkat Mirziyoyev ekani yaxshi. Men uning Qirg‘izistonga munosabatini bilaman, buni qadrlashimiz kerak”, — dedi Atambayev.
Izoh (0)