“Daryo” nashri 14-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiya dengiz floti taktik yadro qurollari bilan dengizga chiqishni boshladi
Rossiya Shimoliy flotining kemalari 30 yil ichida birinchi marta bortida taktik yadro qurollari bilan dengizga chiqishni boshladi, deb xabar bermoqda Norvegiya razvedka xizmati (NIS) o‘zining yillik hisobotida.
Hujjatda aytilishicha, sovet davrida Shimoliy flotning harbiy kemalari muntazam ravishda taktik yadro qurollari bilan dengizga chiqqan, biroq Sovuq urush davridan beri bunday holatlar kuzatilmagan. Razvedka maʼlumotlariga ko‘ra, Ukrainada urush boshlanganidan keyin “Rossiya uchun yadro qurolining ahamiyati sezilarli darajada oshdi”.
“Yadro salohiyatining markaziy qismi Shimoliy flotning suvosti kemalarida va yerusti kemalarida joylashgan. Yadro qurollari NATO davlatlari ishtirok etishi mumkin bo‘lgan operatsiyalarda ayniqsa jiddiy xavf tug‘diradi”, — deyiladi Norvegiya razvedkasi hisobotida.
Shimoliy flot — bu Severomorskda joylashgan Rossiya dengiz flotining tezkor-strategik tuzilmasi. Flot tarkibiga 80 dan ortiq suvosti kemalari va yerusti kemalari, shu jumladan, gipertovushli qurol tashuvchilar kiradi.
Ukraina uchun urush trayektoriyasini o‘zgartirishi mumkin bo‘lgan daqiqalar yaqinlashmoqda. AQSH hukumatidan 10 mlrd dollarlik so‘nggi yordam va Rossiyaga qaratilishi mumkin bo‘lgan yangi sanksiyalar
AQSH prezidenti Jo Baydenning ma’muriyati Ukraina hukumatini urush trayektoriyasini o‘zgartirish uchun hal qiluvchi daqiqa kelgani haqida ogohlantirdi. Bu haqda The Washington Post manbalariga tayanib xabar bermoqda.
Oq uy rasmiylarining fikricha, Rossiya, kutilayotganidek, bahorda hujum boshlaydi, Ukraina esa boy berilgan hududlarni qaytarib olish uchun qarshi hujumga o‘tishi mumkin.
Amerikalik harbiy tahlilchilarning fikricha, Ukraina qo‘shinlari uchun bir vaqtning o‘zida Donetskdagi Baxmutni (u yerda ko‘p oylardan beri shiddatli jang ketmoqda) himoya qilish va AQSH muhimroq deb hisoblagan hududlarni qaytarish uchun bahorgi qarshi hujumni boshlash qiyin bo‘ladi.
WP suhbatdoshlarining ta’kidlashicha, agar Ukraina Rossiya qo‘shin yuborgan yo‘nalishda jang qilsa, bu Rossiya hukumatiga qo‘l keladi.
AQSH Kiyevga bosimni kuchaytirgan, chunki Oq uy uchun Kongressni Ukrainaga avvalgidek yordam berishga majburlash qiyinroq bo‘ladi, bunga sabab — ayrim respublikachilar yordamni qisqartirishni yoqlamoqda.
Jo Bayden ma’muriyati hozirda Kongress bilan Ukrainaga 10 milliard dollar yordam ko‘rsatish ustida ishlamoqda. Yangi yordam paketi Rossiya bosqiniga bir yil to‘lishi munosabati bilan Rossiyaga qarshi yangi sanksiyalar qatorida e’lon qilinishi kutilmoqda.
AQSH rasmiylari Ukrainani imkon qadar uzoq vaqt davomida qo‘llab-quvvatlashga tayyorligini bildirish bilan bir vaqtda, ular yozgacha Kiyev Amerika yordamining amaldagi paketini tugatadi, shundan so‘ng mojaroni siyosiy yo‘llar bilan hal qilish qiyin bo‘ladi, deb ogohlantirmoqda.
O‘zbekistonda “samosud” jarayonlarini kimlar tashkillashtirmoqda
Toshkent viloyati Qibray tumanida ikki yigit tengdoshlarini do‘pposlab, bezorilik jinoyatini sodir etgani haqida xabar berilgandi. Viloyat Ichki ishlar bosh boshqarmasi surishtiruv ishlari natijasini e’lon qildi.
Unga ko‘ra, noma’lum shaxslar 22-yanvar kuni Qibray tumani hududida Telegram-bot orqali topshiriq olib, giyohvandlik moddalarini tarqatish bilan shug‘ullanganlarni urib, tan jarohati yetkazgan va ushbu holatni video tasvirga olgan.
Mazkur holat yuzasidan IIBB va boshqa hamkorlikdagi organlar tomonidan o‘tkazilgan tezkor tadbirda 1997—2003- yilda tug‘ilgan o‘ndan ortiq shaxslar gumonlanuvchi sifatida ushlangan. Ularga nisbatan qamoq ehtiyot chorasi qo‘llangan va jinoyat ishi qo‘zg‘atilib, tergov harakatlariga kirishilgan.
Ma’lum qilinishicha, gumonlanuvchilar ma’lum moddiy manfaat evaziga shu kabi bir nechta voqeada ishtirok etib, tan jarohati yetkazish holati aks ettirilgan video yozuvlarni ijtimoiy tarmoq orqali buyurtmachiga yetkazib bergan. Hozirda tergov-surishtiruv ishlari davom etmoqda.
Izoh (0)