Қирғизистон президенти Садир Жапаров собиқ президент Алмазбек Атамбаевга нисбатан илгари чиқарилган ҳукм бекор қилиниб, унинг колониядан озод этилишига муносабат билдирди.
“Суд ва ҳуқуқ-тартибот идоралари қарор қилишдими, демак биз унга бўйсунишимиз керак. Қонунларга амал қилиб яшашни ўрганишимиз керак. Ўтган йили суд Атамбаевни октябрь воқеалари, мактаб қурилиши ва хорижликларга паспорт бериш бўйича жиноий ишлар бўйича оқлаган эди. Ўшанда ҳам мен суд қарорига бўйсунишимиз кераклигини айтгандим. Бўйсунганмиз”, — деди Жапаров.
У ҳатто душманига ҳам қамоқда ўтиришни раво кўрмаслигини таъкидлади.
“
Ҳатто илон боласи қамоқда бўлмаслиги керак, деган нақл бор. Мен душманимга ҳам қамоқда ўтиришни тиламайман. Парвардигор Пайғамбаримизга: ‘Мен ҳамиша кечиримли ва сабрлилар тарафидаман’, деган. Биз кечиришни билишимиз керак. Агар Худога ишонсак, ишларимиз ўнгидан келади”, — деди Жапаров “Каbar” давлат агентлигига берган интервьюсида.
Алмазбек Атамбаев 14 февраль куни колониядан чиқарилди. Қирғизистон Олий суди Атамбаевга нисбатан илгари чиқарилган ҳукмни бекор қилди ва жиноий ишни қайта терговга юборди. Суд Атамбаевнинг Қирғизистондан ташқарида даволанишига ҳам рухсат берган.
Озодликка чиққанидан кейинги интервьюларидан бирида Атамбаев Ўзбекистон билан эришилган чегара келишувларини қўллаб-қувватлади. Унинг фикрича, бу тарихий қарор бўлган.
“Албатта, ҳозир қўшни давлат раҳбари Шавкат Мирзиёев экани яхши. Мен унинг Қирғизистонга муносабатини биламан, буни қадрлашимиз керак”, — деди Атамбаев.
Изоҳ (0)