Turkiya va Suriyadagi zilzilalar mintaqada o‘tgan 100 yildagi eng dahshatli tabiiy ofatga aylandi. Bu haqda JSSTning Yevropa bo‘yicha mintaqaviy direktori Xans Klyuge ma’lum qildi.
“Bir hafta oldin Turkiyaning markaziy qismida va Suriya shimoli-g‘arbiy qismida sodir bo‘lgan kuchli zilzilalar mintaqadagi so‘nggi asrdagi eng dahshatli tabiiy ofat bo‘ldi”, — dedi Kluge.
U tabiiy ofat oqibatida mintaqada 36 mingdan ortiq odam halok bo‘lgani, har ikki davlatda kamida 26 million kishi gumanitar yordamga muhtoj ekanini alohida qayd etdi. Shu bilan birga, Klyuge bu raqamlar yakuniy bo‘lmasligi mumkinligini ta’kidladi. JSST vakili qurbonlar va jarohatlanganlar soni ikki baravar oshishi kutilayotganini qo‘shimcha qildi.
Klyuge, shuningdek, yaradorlar soni ko‘pligi sabab Turkiyada tibbiyot tizimi katta bosim bilan ishlayotganiga e’tibor qaratdi.
“75 yillik tariximizda JSSTning Yevropa mintaqasida tez tibbiy yordam guruhlarini keng miqyosda joylashtirishni boshladik. Ularning maqsadi qiyin vaziyatda qolgan tibbiy muassasalarni qo‘llab-quvvatlash”, — deya qo‘shimcha qildi Klyuge.
6-fevral kuni Turkiyada 7,7 va 7,8 magnitudali kuchli zilzilalar sodir bo‘ldi. 11-fevral oqshomida seysmologlar 2100 dan ortiq yerosti silkinishini qayd etgan. Vayronkor zilzila qo‘shni mamlakatlarda, jumladan, Suriya, Livan, Shimoliy Kipr Turk respublikasi, Gretsiya Kipri va Iroqda ham sezildi.
Turkiyadagi zilziladan so‘ng 90 dan ortiq davlat o‘z yordamini taklif qildi. Ular qatorida O‘zbekiston ham Turkiyaga 100 kishidan iborat qidiruv-qutqaruv otryadini jo‘natdi.
Izoh (0)