Toshkent shahar Yakkasaroy tumanida aholidan kommunal to‘lovlar uchun yig‘ilgan 158,5 million so‘m naqd pullarni o‘zlashtirgan shirkat rahbari ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holat Bosh prokuratura huzuridagi departamentning Yakkasaroy tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda aniqlangan. “D.K.” xususiy uy-joy mulkdorlari shirkati rahbari S.A. Kichik-Beshyog‘och ko‘chasidagi ko‘p qavatli uylarda yashovchi aholidan kommunal to‘lovlar uchun yig‘ilgan 158,5 mln so‘m naqd pullarni shirkat hisob raqamiga kirim qilmasdan, o‘zlashtirish yo‘li bilan talon-toroj qilgani maʼlum bo‘lgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)