Axborot va ommaviy kommunikasiyalar agentligida “Mahalla” xayriya jamoat fondi axborot xizmati rahbari Hasan Salomov ishtirokida brifing tashkil etildi.
Qayd etilishicha, “Mahalla” xayriya jamoat fondi tomonidan 2022 yilda jami 16 mingdan ziyod kam ta’minlangan oilaga qariyb 8 milliard so‘m miqdorida moddiy yordam ko‘rsatilgan. Jumladan, 1000 dan ziyod fuqarolarga sog‘lig‘ini tiklash uchun salkam 1 milliard so‘m mablag‘ yo‘naltirilgan bo‘lsa, 87 fuqaroga nogironlik aravachasi, 14 nafar fuqaroga esa ortopedik moslamalar olib berilgan. Shuningdek, 26 nafar fuqaroning murakkab jarrohlik amaliyotini o‘tkazishlari uchun malbag‘ ajratilgan.
O‘tgan yilda aholi bandligini ta’minlashga ham alohida e’tibor qaratilgan bo‘lib, 562 nafar fuqaroga tikuv mashinalari, 153 nafariga esa maishiy texnika vositalari olib berilgan.
2 ming 700 nafar fuqaroga kiyim-kechak, 7000 nafardan ziyod aholiga oziq-ovqat, 1000 nafar aholiga xo‘jalik mollari hamda 2000 ga yaqin oilaga naqd pul ko‘rinishidagi moddiy yordam berilgan. “Har bir mahallaga kitob” loyihasi amaliyotga tatbiq etildi. Loyiha doirasida bugungi kungacha 5 mingdan ziyod mahallaga 3 milliard so‘mlik kitoblar tarqatilgan.
Fond huzuridagi “Saxovat va ko‘mak” jamg‘armasining aholini manzilli himoya qilish yo‘nalishidagi o‘rni g‘oyat ahamiyatli. O‘tgan yilda mazkur jamg‘armaga 613 milliard so‘mdan ziyod mablag‘ kelib tushgan. Xalq deputatlari mahalliy Kengashlarning qarorlariga asosan ehtiyojmand oilalarga 225 milliard so‘mdan ziyod mablag‘ yo‘naltirildi.
“Temir daftar”ga kirgan qariyb 200 ming aholiga 222 millard so‘mdan ko‘proq mablag‘ evaziga moddiy qo‘llab-quvvatlangan. “Ayollar daftari”ga kirgan xotin-qizlarni manzilli qo‘llab-quvvatlash ishlari ham jamg‘arma mablag‘lari hisobidan amalga oshirilmoqda.
Shuningdek, o‘tgan 2022 yilda ijtimoiy himoyaga muhtoj ayollarni qo‘llab-quvvatlash uchun 100 milliard so‘mdan ziyod mablag‘ sarflangan. “Yoshlar daftari”ga kirgan yigit-qizlarga 735 million so‘mlik moddiy yordam ko‘rsatilgan.
Izoh (0)