Surxondaryo viloyatida giyohvand moddalar savdosi bilan shug‘ullangan to‘rt nafar narkosavdogar 12 yildan 14 yilgacha qamaldi. Bu haqda O‘zA xabar berdi.
Xabarga ko‘ra, Termiz tumanida yashovchi fuqaro 2021-yil sentyabr oyida Denov tumanida tojikistonlik shaxsdan 2 kg opiy moddasini 14 ming dollarga sotib oladi va kelgusida uni qayta sotib, daromad topish maqsadida uyida saqlaydi.
Shundan so‘ng 2022-yil iyun oyida u Termiz shahri va tumanida yashovchi 2 nafar tanishi bilan ushbu moddani 40 ming dollarga sotgan vaqtlarida DXX xodimlari tomonidan qo‘lga olindi. Holat yuzasidan qo‘zg‘atilgan jinoyat ishi doirasida Termiz shahrida yashovchi shaxs ham mazkur noqonuniy ishga aralashgani aniqlandi.
Jinoyat ishlari bo‘yicha Termiz shahar sudining hukmiga ko‘ra, ushbu 4 nafar shaxs Jinoyat Kodeksining 246 va 273-moddalari bilan aybdor deb topilib, 12 yildan 14 yilgacha bo‘lgan muddatlarga ozodlikdan mahrum etish jazosi tayinlandi.
Izoh (0)