O‘zbekistonning Toshkent, Qashqadaryo, Samarqand, Surxondaryo va Andijon viloyatlarida elektr energiyasi tarmoqlariga noqonuniy ulanish holatlari aniqlandi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departament organlari tomonidan elektr ta’minoti korxonalari xodimlari bilan hamkorlikda tergovga qadar tekshiruvlar o‘tkazilgan. Unda elektr energiyasi tarmoqlariga o‘zboshimchalik bilan ulanish holatlari fosh etilgan.
Xususan, departamentning Zangiota tuman bo‘limi tomonidan tergovga qadar tekshiruvlar o‘tkazilgan. Unda “T.-B.”, “T.A.” MCHJ rahbarlari va “O‘rtaovul” MFYda yashovchi Y.B.lar maishiy xizmat ko‘rsatish binolarini elektr ta’minoti korxonasi bilan shartnoma tuzmasdan, tarmoqqa o‘zboshimchalik bilan ulab, jami 476,6 ming kVt/s elektr energiyasidan noqonuniy foydalangani aniqlangan.
Departamentning Qarshi shahar bo‘limi tomonidan o‘tkazilgan tergovga qadar tekshiruvda “K.g.” MCHJ rahbari va boshqalar korxonaga qarashli issiqxonani elektr tarmog‘iga o‘zboshimchalik bilan ulangani aniqlangan. Bu orqali 348,1 ming kVt/s elektr energiyasidan noqonuniy foydalanilgan.
Departamentning Narpay tuman bo‘limi tomonidan o‘tkazilgan tergovga qadar tekshiruvda, “N.b.” fermer xo‘jaligi rahbari A.T. va boshqalar xo‘jalik transformatorini hech qanday hujjatsiz yuqori kuchlanishli elektr tarmog‘iga o‘zboshimchalik bilan ulab, 212,9 ming kVt/s elektr energiyasidan noqonuniy foydalanganligi aniqlangan.
Departamentning Urganch tuman bo‘limi tomonidan o‘tkazilgan tergovga qadar tekshiruvlarda “Z.Q.” MCHJ va “J.N.” xususiy korxonasi rahbarlari ushlangan. Ular umumiy ovqatlanish hamda qurilish obyektini umumiy foydalanishdagi elektr tarmog‘iga hisoblagichdan tashqari o‘zboshimchalik bilan ulanib, 122,3 ming kVt/s elektr energiyasidan noqonuniy foydalangani aniqlangan.
Shuningdek, departamentning Xonobod shahar bo‘limi tomonidan tergovga qadar tekshiruv o‘tkazilgan. Unda “N.O.” oilaviy korxonasi rahbari korxona binosini umumiy foydalanishdagi elektr tarmog‘iga hisoblagichdan tashqari o‘zboshimchalik bilan ulab, 120 ming kVt/s elektr energiyasidan noqonuniy foydalanilgani aniqlangan.
Ushbu qonun buzilish holatlari oqibatida davlat va jamiyat manfaatlariga jami 618 million so‘m zarar yetkazilgan.
Holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)