Oliy taʼlim, fan va innovatsiyalar vaziri Ibrohim Abdurahmonov ishga joylanmagan bitiruvchilari soni ko‘p bo‘lgan OTM sifatsiz taʼlim berayotgan muassasa deb topilishi va kelajakda ularning faoliyatini tugatish masalasi ko‘rib chiqilishi mumkinligini aytgandi. Uning rektor va masʼul prorektorlari bilan kengaytirilgan onlayn yig‘ilishda aytgan bu gaplari turli muhokamalarga sabab bo‘lgach, vazirlik bu borada qo‘shimcha tushuntirish berdi.
“Vazir rektorlarga ta’lim sifatini oshirish bo‘yicha ogohlantirish berarkan, bunda bir maqsad ko‘zlangan — ta’lim sifatini oshirish. Ya’ni bitiruvchilarni mehnat bozorida mavjud ish o‘rinlariga mos salohiyatga ega kadrlar sifatida shakllantirish OTMlarning bosh vazifasi bo‘lishi kerak”, — deyiladi bayonotda.
Vazirlik dunyo tajribasida 60 foiz talabalar amaliyot o‘tagan joylarida talabalik davrlaridayoq ish joylarini topib bo‘lishini qayd etib, Garvard, Oksford, Kembrij kabi xorijdagi OTMlar bitiruvchilarini ish bilan ta’minlash bo‘yicha eng ilg‘orligi, shu sababli ham ularning nufuzi baland ekanini bildirib o‘tgan.
“Misol qilib keltiradigan bo‘lsak, ta’lim tizimiga alohida e’tibor qaratib, yuksak natijalarga erishayotgan davlatlardan biri — Singapur. Singapurda oliy ta’limga mudofaa tizimi darajasida e’tibor berilishi diqqatga sazovordir, ya’ni qat’iy tartib-intizom, nazorat yo‘lga qo‘yilgan. Singapurda ta’lim siyosati davlatning iqtisodiy va ijtimoiy rivojlanishi bilan baravar yurishi kerak, degan tamoyilga amal qilinadi.
Ya’ni har bir OTM bitiruvchisi ish joyiga ega bo‘lishi shart. QS reytingiga ko‘ra dunyoda 11-o‘rin, Osiyoda 1-o‘rinni egallab kelayotgan Singapur milliy universiteti rahbarlari ularning birorta bitiruvchisi ishsiz emasligi aytib o‘tildi. Universitet bitiruvchilarining ishga joylasha olmasligi bu oliy o‘quv yurtining nufuzi, sha’ni va qadriyatlariga putur yetkazadi, deb hisoblanadi”, — deyiladi vazirlik xabarida.
Ta’kidlanishicha, OTMlar ish o‘rni mavjud bo‘lmagan sohalarda o‘qish tashkil etmaydi. Ta’lim dasturlari mavjud bo‘sh ish o‘rinlarni hisobga olgan holda ishlab chiqiladi. Har bir universitet o‘z navbatida ishchi o‘rin uchun kurashadi. Bu ta’limda raqobat muhitini yaratadi.
“Shundan kelib chiqib, majlisda bildirilgan fikr OTM rahbariyatining talabalarni ishga joylashga, yoshlarning ma’lum bo‘sh ish o‘rinlariga tayyor kadr bo‘lib yetishishlariga yordam berishga qaratilgan. Bunda oliy ta’lim muassasasi rahbarlarining OTM bitiruvchilarini o‘zgaruvchan mehnat bozorida ish bilan ta’minlanishiga yanada mas’uliyat bilan qarashlari lozimligi nazarda tutilgan
Oliy ta’lim, fan va innovatsiyalar vazirligi o‘z tasarrufidagi OTMlar rahbarlariga ta’lim sifatini oshirish bo‘yicha topshiriq berish va ta’lim sifati past bo‘lgan OTMlarni ogohlantirish vakolatiga ega”, — deyiladi Oliy taʼlim, fan va innovatsiyalar vazirligi xabarida.
Qayd etish joiz, vazirlik dastlab e’lon qilgan xabarida bitiruvchilari soni ko‘p bo‘lgan OTM sifatsiz taʼlim berayotgan muassasa deb topilishi va kelajakda ularning faoliyatini tugatish masalasi ko‘rib chiqilishi keltirilgandi. So‘ng unga tuzatish kiritilib, ogohlantirishda nodavlat OTM nazarda tutilgani ko‘rsatildi.
Biroq vazirlikning yuqoridagi munosabatida o‘z tasarrufidagi OTMga ogohlantirish berish vakolati borligi yozilgan. Vazirlik tasarrufidagi oliygohlar esa davlat OTMlari hisoblanadi.
Izoh (0)