Namangan muhandislik qurilish institutining 3-bosqich talabasi X.X. 10-fevral kuni oliygohda 5 ta fandan oraliq imtihonlarni topshira olmagani sababli qayta topshirishga qoldi.
Bosh prokuratura axborot xizmatining “Daryo”ga xabar berishicha, guruh rahbari talabaning otasiga qo‘ng‘iroq qilib, o‘g‘li yuqoridagi 5 ta fandan oraliq imtihonlarni topshira olmagani haqida ogohlantirgan.
O‘z navbatda ota o‘g‘liga telefon orqali tanbeh bergan. Shundan so‘ng talaba otasi bergan tanbehga zarda qilib, ruhiy tushkunlikka tushgan va Yangiqo‘rg‘on tumani “Nurafshon” mahallasi hududidagi dala-adirlikda o‘z joniga suiqasd qilgan.
Uning jarohat olganini ko‘rib qolganlar yordam ko‘rsatib, shifoxonaga olib kelgan. Tibbiy ma’lumotga ko‘ra, X.X.ning badani alangadan 50 foiz darajada chuqur kuygan. Shifokorlar tomonidan ko‘rsatilgan tez-tibbiy muolajalarga qaramasdan u 13-fevral kuni shifoxonada vafot etgan.
Yangiqo‘rg‘on tuman prokuraturasi tomonidan holat yuzasidan Jinoyat kodeksining 103-moddasi (o‘zini o‘zi o‘ldirish darajasiga yetkazish) 1-qismi bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)